بە پێی ڕاپۆرتی جام کوردی، نوێترین ئاماری بڵاوکراوەی گومرکی چین پیشان دەدات کە ئاڵوگۆڕە بازرگانییەکانی ئەم وڵاتە لە گەڵ ئێران لە 8 مانگی تێپەڕبووی ساڵی 2022، بەراورد بە ماوەی هاوشێوەی ساڵی ڕابردوو لە سەدا 19 بەرزبوونەوەی تۆمار کردووە و گەیشتووەتە 11 ملیار و 160 ملیۆن دۆلار.
بەهای ئاڵوگۆڕە بازرگانییەکانی نێوان ئێران و چین لە مانگی کانوونی دووەم تا ئابی ساڵی 2021 زیاتر لە 9 ملیار و 344 ملیۆن دۆلار بووە.
هاوردەی چین لە ئێران تا کۆتایی مانگی 8 ی 2022 بەراورد بە ماوەی هاوشێوەی ساڵی ڕابردوو لە سەدا 14 بەرزبوونەوەی هەبووە و گەیشتووەتە 4 ملیار و 946 ملیۆن دۆلار. چین لە ماوەی هاوشێوەی ساڵی ڕابردوو 4 ملیار و 344 ملیۆن دۆلار کاڵای لە ئێران هاوردە کردبوو.
هەناردەی چین بۆ ئێران لە مانگی کانوونی دووەم تا ئابی ئەمساڵ بە لە سەدا 24 بەرزبوونەوە گەیشتووەتە 6 ملیار و 214 ملیۆن دۆلار. چین لە ماوەی هاوشێوەی ساڵی ڕابردوو 5 ملیار دۆلار کاڵای هەناردەی ئێران کردبوو.
هەر بە پێی ئەم ڕاپۆرتەش، چین لە مانگی ئابی ئەمساڵ یەک ملیار و 14 ملیۆن دۆلار کاڵای هەناردەی ئێران کردووە و 476 ملیۆن دۆلار کاڵاشی لە ئەم وڵاتە هاوردە کردووە. هەناردەی چین بۆ ئێران لە مانگی ئاب لە سەدا 36 بەرزبوونەوەی هەبووە بەڵام هاوردەی لە ئەم وڵاتە لە سەدا 33 بەراورد بە مانگی ئابی ساڵی 2021 دابەزینی هەبووە./.