بە پێی ڕاپۆرتی جام کوردی، دەستەی بازرگانی دەرەکیی ئەردەن ڕایگەیاند کە عێراق لە پلەی دووەمی زیاترین هاوردەی کاڵای ئەم وڵاتە لە ساڵی ڕابردوو بووە.
ڕاپۆرتێکی دەستەی بازرگانی دەرەکیی ئەردەن ئاشکرای دەکات کە کۆی گشتی هەناردەی ئەم وڵاتە بۆ وڵاتانی ناوچەی بازرگانی ئازادی عەرەبی لە ساڵی 2022 گەیشتووەتە 2 ملیار و 500 ملیۆن دیناری ئەردەنی و ئەمەش پیشاندەری بەرزبوونەوەی لە سەدا 22.6 هەناردەیە بەراورد بە ساڵی ڕابردووی.
ڕاپۆرتەکە هەروەها پیشان دەدات کە سعوودیە بە بەهای نزیکەی 768 ملیۆن دیناری ئەردەنی پلەی یەکەمی ئەو وڵاتانەی هەیە کە زیاترین هاوردەیان لە ئەردەن هەبووە.
عێراقیش بە هاوردەی نزیکەی 565 ملیۆن دیناری ئەردەنی پلەی دووەمی هەبووە و فەڵەستین بە 182 ملیۆن دینار لە پلەی سێهەم و ئیمارات بە نزیکەی 165 ملیۆن دیناری ئەردەنی پلەی چوارەمی مسۆگەر کردووە.
گرنگترین هەناردەی ئەردەن بۆ وڵاتانی عەرەبی بریتییە لە پەینی کیمیاوی، دەرمان، میوە و سەوزە، خوێ، بەرهەمەکانی پاراستنی پێست، ڕەنگ، شۆکۆلاتە، قوماش و کەرەستەی نێوماڵ./.
