بە پێی ڕاپۆرتی جام کوردی، ئەسیر غەریری وەزیری بازرگانی عێراق ڕۆژی دووشەممە 13 ی ئازاری 2023 وردەکاری پێنجەمین کۆبوونەوەی کۆمیسیۆنی هاوبەشی ئێران و عێراق و واژۆکردنی ڕێکەوتنی پەرەپێدانی هاوکارییە ئابورییەکانی نێوان هەر دوو وڵاتی ئاشکرا کرد.
ناوبراو لە کۆنگرەیەکی ڕۆژنامەوانی هاوبەش لە گەڵ ئێحسان خاندوزی وەزیری ئابوری و دارایی ئێران وتی: پێنجەمین کۆبوونەوەی کۆمیسیۆنی هاوبەشی عێراق و ئێران لە گەڵ واژۆکردنی ڕێکەوتنی پەرەپێدانی هاوکارییە ئابورییەکان بووە کە دەبێتە هۆی زیاتربوونی هاوکارییە ئابورییەکان و دابینکردنی بەرژەوەندییەکانی هەر دوو وڵات و چەندین بابەتی وەک سەرمایەگوزاری لە ناوچەکانی ئازاد لە بواری بازرگانی و ئاڵوگۆڕی ئابوری و کردنەوەی ناوچەکانی پیشەسازی و هەروەها هاوکاری لە بواری ڕێگای ئاسن و پرۆژەکانی ئاو و سنورە هاوبەشەکان و کارەبا و نەوت و کاروباری بانکی لە خۆ دەگرێت.
وەزیری بازرگانی عێراق وتی: ڕێکەوتنی پەرەپێدانی هاوکارییە ئابورییەکانی نێوان هەر دوو وڵات واژۆ کراوە و وەزیری بازرگانی عێراق و وەزیری ئابوری ئێران بەدواداچوون بۆ ئەم ڕێکەوتنە دەکەن.
ئەسیر غەریری وتی کە ئەم ڕێکەوتنە بە فەرمانی سەرۆک وەزیرانی عێراق و بە چاودێری کەرتی تایبەت بە ئامانجی ئاسانکاری لە هەناردەی لایەنی عێراقی و هاوسەنگکردنی ئاڵوگۆڕە بازرگانییەکان واژۆ کراوە تا پەیوەندییەکی باشتری ئابوری لە هەر دوو لاوە ببینرێت.
ناوبراو ڕایگەیاند کە حکومەتی عێراق گرنگی بە پەیوەندییەکانی لە گەڵ وڵاتانی جیهان بە تایبەت وڵاتانی دراوسێ دەدات و تا ئێستاش ڕۆڵی لە ڕێکەوتن و لێک تێگەیشتنە نێودەوڵەتییەکان لە گەڵ وڵاتانی دراوسێ بە تایبەت کۆماری ئیسلامی ئێران هەبووە./.