خولی یەکەمی خەڵاتی ساڵی سوهراب سپێهری لە لایەن ڕێکخراوی فەرهەنگی، کۆمەڵایەتی و وەرزشی شارەوانی کاشان بە ئامانجی پاراستنی بیر و بەرهەمەکانی شاعیر و نیگارکێشی ناوداری هاوچەرخ سوهراب سپێهری و بەرەوپێشبردنی تێڕوانینی مرۆڤدۆستانە و هونەریی ناوبراو بەڕێوەچوو. ئەم بۆنە ئەدەبییە بە ئامادەبوونی کەسایەتییەکانی پارێزگا جیاجیاکانیئێران و پێشوازیکردن لە شاعیرانی لاو و دێرین لە دوو بەشی: "شیعر" و "وێناکردن" پێک هات.

لە بەشی شیعری نوێی ئەم خەڵاتەدا، ١١٥ کۆمەڵە شیعری شاعیرانی سەرتاسەری وڵات ڕەوانەی نووسینگەی خەڵات کران و دوای چەند قۆناغێک لە داوەری، پێنج بەرهەم گەیشتنە قۆناغی کۆتایی. بەرهە پاڵێوراوەکان بریتی بوون لە: "فڕفڕەی کاوڵی " لە نووسینی میهدی حاتەمی، "ئێسکە برسییەکان" لە نووسینی سابیر سەعدیپوور، "پشکۆکانم دەبنە چۆلەکە" لە نووسینی لەیلا پەیکریفەر، "لە پشت کام هەورەوە ماویتەوە" لە نووسینی یوسف عەلیپوور، و "ماهبان" واتا مانگبان، لە نووسینی موحسین حوسێنخانی.

بە پێی دەنگی کۆتایی لێژنەی داوەران کە پێکهاتبوون لە مستەفا عەلیپوور، عەلیرەزا فوولادی و سەید عەلی میرفەزلی، کۆمەڵە شیعری "مەهبان"ی شاعیری کرماشانی موحسین حوسێنخانی بە شایستەی وەرگرتنی نازناوی بژاردەی کۆتایی ناسێندرا.

خەڵاتی ساڵی سوهراب سپێهری کە وەک تاکە بۆنەی ئەدەبی ئێران لە بواری شیعری نوێدا بەڕێوە دەچێت، لە بەهاری ساڵی ١٤٠٤ دامەزرا و ئامانجیشی جگە لە ڕێزلێنان لە سوهراب سپێهری، دروستکردنی ڕەوتێکە لە شیعری هاوچەرخی ئێران و پاڵپشتیکردنی شاعیرانی نوێخواز.