حاکم قادر حەمەجان لەپەیامێکدا ئاماژەی بەوەکرد،" لەکاتێکدا کورد لە ڕۆژئاڤای کوردستان ڕوبەڕوی گەلەکۆمەکێیەکی ئیقلیمی و نێودەوڵەتی بوەتەوە و جینۆساید دەکرێت، بەڵام دڵخۆشیەکی قوڵیش هەمومانی ڕوپۆش کردوە، دڵخۆشیەک کە چێژی یەکبون و یەک گوتاری نەتەوەی لە پشتەوەیە ".
ئەوەشیخستەڕوو،" ھەموان دەزانین لە پیلانگێڕیەكی بە بەرنامە زیاتر لە 100 ساڵە هەوڵی لێکدابڕاندن و پارچە پارچەکردنی ئەم گەلە دەدەن، ئەمڕۆ چ لە ناوخۆ و لە هەموو پارچەکانی کوردستان و ڕەوەندی کوردی بە هەستێکی کوردانە و مرۆڤ دۆستانە و بە هەڵوێستێکی سەردەمیانە، لە مۆدێلێكی مەدەنیانە هێزی کورد و توانای کوردییان نیشانی تەواوی جیهاندایەوە، مۆدێلێك كە بازنەی تەسكی حزبایەتی تێپەڕاندوەو پەیامەكەی نەتەوەیی و نیشتمانی و یەكڕیزی كوردانە ".
حاکم قادر حەمەجان باسی لەوەشکرد،" ئەمڕۆ ھەموان شاھیدی ئەوەین كە بۆ یەکەم جارە گەلی کورد بە یەک دەنگ و بە یەکگرتوی و لەژێر ئاڵای پیرۆزی کوردستاندا بەرگری لە مافە نەتەوایەتی و مافە دەستوری و یاسایی و سیاسی لەسەر بنەماكانی مافی مرۆڤ دەكەن ".
وتیشی،" دەبوو پێشتر حزبە کوردستانیەکان بەم ئەرکە نیشتیمانی و نەتەوەییە هەستانایە، بەداخەوە نەکردیان و نەتوانیان بیکەن، تا ئێستا حزبە کوردستانیەکانی ھەرێمی كوردستان دوای زیاتر لە ١٤ مانگ لە ھەڵبژاردن، نەیان توانیوە پەرلەمان و حکومەت پێکبهێنن، ئایا كێشە و پرس و دۆزی نەتەوەكەمان لەسەر پێنەدانی پۆستێک یان وەرگرتنی پۆستێکە! ".
حاکم قادر داواکارییەک ئاراستەی هێز و لایەنە سیاسییەکان دەکات و دەڵێت،" پێویستە سەرکردەکان چاو لە گەلەکەمان بکەن و تێبگەن، تاکە ڕێگا بۆ ڕزگارکردنی ئەم دۆخە چەقبەستوە و گەیشتن بە کەناری ئارامی، یەکێتی ناوخۆییە، یەک هەڵوێستی و یەکگوتارییە، دەبێت کێبڕكێ لەسەر قوربانیدان و خزمەتگوزاری زیاتر بێت، نەک لەسەر پۆست و پلە و پایە ".
ڕاشیدەگەیەنێت، دۆخی نوێ و ئەم یەكڕیزیەی كوردان و پەلاماردانی دڕەندانەی دوژمنانی نەوەكەمان وایکرد، ھەڵوێستی دوژمن، نۆکەر، خۆفڕۆش، بەکرێگیرا و جاش و جاسووسە ناوخۆییەکوردەکانمان بۆ دەربکەوت، ھەڵوێستی نیشتمانپەروەی و ڕاستگۆییان بۆ كوردان لە محەك بدرێت.
جەختیشیکردەوە،" ئەمڕۆ لە ھەموو شتێك گرنگتر ئەركی ھەمومانە كە ئەم یەكگرتوییە و یەكڕیزیەی ناوخۆ و ڕەوەندی كوردی بپارێزین و دەبێت سود لە ھاتنە پێشەوەی ئەم نەوە تازەیە وەربگیرێت بۆ بەرزكردنەوەی گیانی بەرگری و گۆڕانكارییەكان چونكە ئەم دەركەوتنەوەی ئەوان بە ئاڵای كوردستانەوە نا یەكی گەورە بوو بۆ فەرسكردن و درێژەپێدانی ئەو واقعیە تاڵەی كە زیاتر لە ۱۰۰ ساڵە كورد بە دەستیەوە دەناڵێنێت و قوربانی بۆ دەدات "
لەکۆتایدا ڕونیکردەوە،" دوژمنان و ھەندێك لە حزبەكان وایان دەزانی گەنجان و لاوانمان لەناوەوە و لە دەرەوە ھەست و سۆزی كوردبوون و كوردایەتیان نەماوە، بەڵام ئێستا بۆ تەواوی دنیا و دوژمنەكانیان سەلماند، كە كورد گەلێكی خۆڕاگر و داكۆكیكارە لەسەر مافە ڕەواكانی خۆی ".