بەپێی ڕاپۆرتی جام کۆردی، دکتۆر عەبدولڕەحمان پرنا سەرۆکی ئەم کۆمەڵە پزیشکییە ئاماژەی بە پەرەسەندنی وردە وردەی ئەم سەنتەرە کرد لە ساڵی 2005 ەوە تا ئێستا و دەڵێت: کۆمەڵەی ئیمام ڕەزا (ع) کە بە 515 قەرەوێڵەی دەستیپێکردووە و ئەوا ئێستا نەخۆشخانەی گوڵستان و نەخۆشخانەی شەهید ڕەیسی (سەنتەری دەستنیشانکردن و چارەسەری شێرپەنجە) دەگرێتەوە و گەیشتووەتە 957 قەرەوێڵەی پەسەندکراو و وەک سەرچاوەیەکی پزیشکی بۆ بەشی ڕۆژئاوای وڵات ناسراوە.
ناوبراو بە ئاماژە بەوەی کە ئەو نەخۆشانەی لە پارێزگاکانی ئیلام، کوردستان و لوڕستانەوە ڕەوانە دەکرێن سەردانی ئەم ناوەندە دەکەن، زیادی کرد: ئێمە لە بەشی نێودەوڵەتی (IPD) نەخۆشە بیانییەکانیش بە تایبەت لە عێراقەوە وەردەگرین، ساڵی ڕابردوو 420 نەخۆش لەم بەڕێوەبەرایەتییە وەرگیراون کە25 نەخۆشیان خەڵکی بیانی بوون.
د.پرنا وتیشی کە ساڵی ڕابردوو نزیکەی 14 هەزار نەشتەرگەری ئەنجام دراوە و زیادیشی کرد: 65 قەرەوێڵەی ICU چالاک لە سەنتەرەکەدا هەمیشە لە خزمەت نەخۆشەکاندایە، هەروەها بەشی ICUی تازەلەدایکبووان کە 30 قەرەوێڵەی تێدایە وەکوو جەمسەری چارەسەر بۆ دایکانی دووگیان کە نەخۆشی سەختەیان هەیە کاردەکات و چالاکە. هەروەها ساڵی ڕابردوو زیاتر لە 3 هەزار و 200 منداڵی تازە لەدایکبوو نێویان لەم کۆمەڵگە پزیشکییەدا تۆمارکراوە.
بە پێی وتەی ناوبراو، ساڵی ڕابردوو زیاتر لە 90 هەزار سەردان بۆ ژوورە فریاگوزارییە تایبەتمەندەکانی کۆمەڵگەکە کراوە، لەو ژمارەیەش نزیکەی 40 هەزار سەردان لە نەخۆشخانە خەوێندراون. لە بەشی پاراکلینیکدا هەزاران MRI، CT سکان، PET سکان، سۆنەر و زیاتر لە 240,000 پشکنین ئەنجامدرا، ئەمەش ئاماژەیە بۆ قەبارەی زۆری خزمەتگوزارییەکان کە لەلایەن ئەم کۆمەڵگەوە پێشکەش دەکرێن. هەروەها لەم سەنتەرەدا 62 چاندنی مۆخی ئێسک و 15 چاندنی گورچیلە ئەنجامدراوە.
سەرۆکی کۆمەڵگەی پزیشکی ئیمام ڕەزا (ع) بە ئاماژە بە چالاکییەکانی نزیکەی 2500 هێزی مرۆیی و 190 پزیشک لەم کۆمەڵگەدا جەختی لەوە کردەوە: ژێرخانی نەخۆشخانەکە و ئامێرەکانی کە بۆ توانای سەرەتایی داڕێژراون، وەڵامدەرەوەی قەبارەی خزمەتگوزارییەکانی ئێستا نین و پێویستیان بە نۆژەنکردنەوەی جددی هەیە.
ناوبراو هیوای خواست بە پاڵپشتی بەرپرسانی پارێزگا و نیشتمانی پڕۆسەی نوێکردنەوەی ئامێرەکان و خێرا پتەوکردنی ژێرخانەکان بکرێت بۆ ئەوەی ئەم سەنتەرە بتوانێت بەردەوام بێت لە ڕۆڵی ستراتیژی خۆی لە گەشتیاری تەندروستیدا و خزمەتگوزاری پێشکەش بە نەخۆشانی ناوخۆ و بیانی بە کوالیتی بەرزتر بکات.