دوکتور عەباس عێراقچی، وەزیری دەرەوەی ئێران ئەمڕۆ (هەینی) لە نێوان زیادبوونی ئامادەیی سەربازیی ئەمریکا لە ڕۆژهەڵاتی ناوەڕاست و زیادبوونی ڕاپۆرتەکان سەبارەت بە ئەگەری کردەی سەربازی دژ بە تاران، وتی: پرسی دۆسیەی ئەتۆمی ئێران بە ڕێگای سەربازی چارەسەر ناکرێ.
عێراقچی لە چاوپێکەوتنێکدا لەگەڵ تۆڕی ئێم ئێس ئێن بی سی ڕایگەیاند کە هیچ چارەسەرێکی سەربازی بۆ ئەم پرسە نییە و تاکە چارەسەر دیپلۆماسییە، ئاماژەی بەوەشکرد کە ئەمە لە ساڵی ڕابردوودا پشتڕاستکرایەوە کاتێک هێرشێکی گەورە بۆ سەر دامەزراوە ئەتۆمییەکان ئەنجامدرا.
ئاماژەی بەوەشکرد، واشنتۆن داوای لە تاران نەکردووە بۆ هەمیشە دەستبەرداری پیتاندنی یۆرانیۆم بێت. هەروەها تاران پێشنیاری ڕاگرتنی کاتی پیتاندنی یۆرانیۆمی ئێرانی پێشکەش بە واشنتۆن نەکرد. ئەو ڕاپۆرتانەی باس لەوە دەکەن کە ئێران بە ڕواڵەت پێشنیاری ڕاگرتنی پیتاندنی یۆرانیۆمی کردووە بۆ ماوەی دوو بۆ سێ ساڵ، ڕاست نین، هەروەها ئەمریکا داوای وازهێنانی تەواوەتی کردووە، ڕاست نییە.
عێراقچی ڕاشیگەیاند: "هەنگاوی داهاتوو بۆ هێزە چەکدارەکانمان پرسێکی جیایە. من لەو بەشەدا بەشدار نیم. من کاری خۆم دەکەم. هەنگاوی داهاتوو بۆ من ئەوەیە کە ڕەشنووسی ڕێککەوتنێکی ئەگەری پێشکەش بە هاوتاکانم لە ئەمریکا بکەم. پێموایە ئەم ڕەشنووسە لە چەند ڕۆژی داهاتوودا ئامادە دەبێت. دوای ڕەزامەندی کۆتایی لەلایەن دەسەڵاتە باڵاکانەوە، ڕادەستی ستیڤ ویتکاڤ دەکرێت، ڕەنگە کۆبوونەوەیەکی دیکە پێویست بێت بۆ گفتوگۆکردن لەسەری، و دواتر دەست دەکەین بە کارکردن لەسەر دەقی ئەو ڕەشنووسە، هیوادارم بگەینە ئەنجامێکی لەبار و پێموانییە لە ماوەی هەفتەیەکدا کاتێکی زۆری پێبچێت، بە کەمێک زیاتر، بتوانین دانوستانێکی جددی لەسەر دەقەکە دەستپێبکەین و بگەینە ئەنجامێک.