ئەو سەرچاوەیە بانگەشەی ئەوەی کردووە کە ئێران دەبێ بڵێت دەبێ چ پارێزبەندییەک هەبێت بۆ ئەوەی بتوانێت وەک وڵاتانی دیکە بەرنامەی ئەتۆمی هەبێت. سەرچاوەکە بانگەشەی ئەوەی کردووە کە واشنتۆن دەیەوێت پێشنیارێکی ورد وەربگرێت. ناوبراو بانگەشەی ئەوەی کرد کە واشنتۆن پێویستە لە ماوەی هەفتەیەکدا پێشنیارێکی لەو شێوەیە وەربگرێت.
ئەو سەرچاوە حکومییە هەروەها بانگەشەی ئەوەی کرد کە بارگرانی لەسەر شانی ئێرانییەکان هەیە، چونکە هیچ متمانەیەک نییە و ئێران هەموو ئەو ڕێککەوتنانەی لەگەڵ ئەمریکا هەیبوو شکاندووە. ئەم بانگەشەیە لە کاتێکدایە کە ئەمریکا لە خولی یەکەمی ترەمپ سەرەڕای پابەندبوونی تەواوی ئێران بە سنووردارکردنی بەرنامەی پیتاندنەکەی لە ڕێککەوتنی ئەتۆمی لەگەڵ ئەو وڵاتە کشایەوە و سزای تاکلایەنەی بەسەر ئێراندا سەپاند.
داواکارییەکەی ترەمپ بۆ وەستاندنی پیتاندنی یۆرانیۆم لە لایەن ئێرانەوە، داواکارییەکی دەرەوەی یاسا و پێچەوانەی پەیماننامەی NPT یە.
بەپێی یاسا نێودەوڵەتییەکان و NPT هیچ ڕێژەیەک بۆ پیتاندنی یۆرانیۆم دیاری نەکراوە. بەڵکو بەپێی مادەی چوارەمی پەیماننامەی نێودەوڵەتی نەهێشتنی چەکی ئەتۆمی (NPT)، هەموو وڵاتان خاوەنی مافی "پەرەپێدانی توێژینەوە و بەرهەمهێنان و بەکارهێنانی وزەی ئەتۆمی بۆ مەبەستی ئاشتیانە بەبێ هیچ جیاکارییەک"ن، ئەمەش بە شێوەیەکی ناڕاستەوخۆ دان بە مافی وڵاتانی ئەندامدا دەنێت بۆ پیتاندنی یۆرانیۆم بەبێ ئەوەی ڕێژەیەکی دیاریکراو دیاری بکەن.
لەلایەکی دیکەوە سەید عەباس عێراقچی وەزیری دەرەوەی ئێران ڕۆژی هەینی لە چاوپێکەوتنێکدا لەگەڵ کەناڵێکی ئەمریکی، ڕایگەیاند: واشنتۆن لە خولی دووەمی دانوستانەکان لە جنێڤ داوای لە تاران نەکرد بۆ هەمیشە دەستبەرداری پیتاندنی یۆرانیۆم بێت. هەروەها تاران پێشنیاری ڕاگرتنی کاتی پیتاندنی یۆرانیۆمی ئێرانی پێشکەش بە واشنتۆن نەکرد. ئەو ڕاپۆرتانەی باس لەوە دەکەن کە ئێران بە ڕواڵەت پێشنیاری ڕاگرتنی پیتاندنی یۆرانیۆمی کردووە بۆ ماوەی دوو بۆ سێ ساڵ، ڕاست نییە، هەروەها ڕاست نییە کە ئەمریکا داوای ڕاگرتنی تەواوەتی پیتاندنی یۆرانیۆم دەکات.