عومەر عەلی ئاماژە بەوە دەکات کە لە ساڵی ٢٠١٤، ئەمریکا بە هەمان شێوازی ئێستا داوای لە (یەپەگە) کرد بۆ ڕووبەڕووبوونەوەی داعش هاوکارییان بکات. دواتر لە ٢٠١٥دا (هەسەدە) دروست کرا و کورد زیاتر لە ١٠ هەزار قوربانی لەو پێناوەدا دا، بەڵام دەرەنجامەکەی جێهێشتنی کورد بوو لەلایەن واشنتنەوە.
عومەر عەلی دەڵێت: "کاتێک داعش کۆتایی هات، ئەمریکا پشتی تێکردن. تۆم باراک بە ئاشکرا وتی ڕۆڵی هەسەدە تەنها بۆ شەڕی داعش بوو و لێرەدا کۆتایی پێ دێت. تەنانەت داوایان لێکردن تێکەڵ بە سوپای سووریا ببنەوە و لە بەرامبەر هێرشەکانی دیمەشقدا بێباک بوون."
بەپێی دیدگای ئەم سیاسەتمەدارە، داواکاریی ئەمجارەی ئەمریکا لە هەردوو حیزبی حوکمڕانی هەرێم و بەرەی هاوپەیمانی هێزەکانی ڕۆژهەڵات، تەنها بۆ بەکارهێنانی کوردە وەک "جەنگاوەر" بۆ لێدانی ئێران. ئەوەی جێگەی مەترسییە، نەبوونی هیچ پڕۆژەیەکی سیاسی یان پلانێکی پاراستنە (وەک ناوچەی دژەفڕین) بۆ کوردانی ڕۆژهەڵات و باشوور لە ئەگەری وەڵامدانەوەی توندی ئێران.
عومەر عەلی چەند خاڵێکی جەوهەری وەک پێویستییەک بۆ قۆناغەکە دەخاتە ڕوو:
تێپەڕاندنی گرێی خۆبەکەمزانین: پێویستە هێزە کوردییەکان وەک خاوەن جوگرافیا و هێز مامەڵە بکەن، نەک وەک جەنگاوەری بەکرێگیراو بۆ ئامانجەکانی ئیسرائیل و ئەمریکا.
هەرێمی کوردستان بەرگەی سووتەمەنی جەنگێک ناگرێت کە هیچ ئایندەیەکی ڕۆشنی تێدا نییە.
بۆیە پێویستە وەڵامی کورد بۆ داواکاریی دەرەکی تەنها یەک دەنگ بێت، ئەویش "پاراستنی ئاسایشی نەتەوەیی هەرێمە".
هاوزەمان نابێت ڕێگە بدرێت خاکی هەرێم و هێزەکانی ڕۆژهەڵات ببنە هەڕەشە بۆ سەر دراوسێکان، چونکە هەرێم وەک قەوارەیەکی فیدراڵی دەبێت لەگەڵ سیاسەتی ناوەندیی بەغدا هاوتەریب بێت.
لە کۆتاییدا ئەوەی گرنگە عومەر عەلی جەخت دەکاتەوە کە نابێت کورد چیتر ببێتە سووتەمەنی ئەو جەنگانەی زلهێزەکان لە ناوچەکەدا دایدەگیرسێنن. وانە وەرگرتن لە شکستی ئەزموونی ڕۆژئاوا و پاراستنی سەقامگیریی هەرێم، دەبێت لە پێشینەی کارەکان بێت، چونکە لە کۆتاییدا زلهێزەکان تەنها بۆ بەرژەوەندی کاتی خۆیان کورد وەک "جەنگاوەری ئازا" نیشان دەدەن و دواتر بە تەنیا جێی دەهێڵن.