لە بەشێکی شیکردنەوەکەیدا، یاسین تەها جەخت لەسەر ئەوە دەکاتەوە کە موجتەبا خامنەیی بەهۆی قووڵبوونەوەی لە وردەکارییە ئەمنی و سیاسییەکاندا بۆ ماوەی چەندین ساڵ، خاوەنی توانایەکی بێوێنەیە بۆ بڕیاردانی خێرا. ئەم تایبەتمەندییە وەک فاکتەرێکی یەکلاکەرەوە دەبینرێت بۆ کۆنتڕۆڵکردنی دۆخەکە و ڕێگریکردن لە هەر پشێوییەک کە ڕووبەڕووی کۆماری ئیسلامی ببێتەوە.
نووسەر ئاماژە بەوەش دەکات کە ڕێبەری نوێ، سەرباری هەژموونی لە پشتپەردەدا، توانایەکی بەرچاوی هەیە بۆ کۆکردنەوەی باڵە کەنارگیر و شۆڕشگێڕە کاریگەرەکان لە دەوری خۆی. هاوکات، موجتەبا خامنەیی وەک کەسایەتییەک دەردەکەوێت کە نەک تەنیا لە ناوخۆدا بەهێزە، بەڵکو خاوەن دەسەڵاتی سیاسیی پێویستیشە بۆ ئەنجامدانی سازش و دانوستان لەگەڵ ئەمریکا و وڵاتانی دەرەوە، ئەگەر بەرژەوەندیی سیستەمەکە وای بخوازێت.
بەپێی ڕاپۆرتەکە، ڕزگاربوونی موجتەبا خامنەیی لە هەوڵەکانی تیرۆرکردن و دیاریکردنی کتوپڕی وەک ڕێبەر، نیشانەی بوونی پلانێکی پێشوەختە و تۆکمەیە بۆ جێگرتنەوەی باوکی. هەرچەندە نەیارانی دەرەکی وەک ئەمریکا و ئیسرائیل ناڕەزایەتی بەرامبەر بژاردەی ڕێبەرێکی "ڕەها" نیشان دەدەن، بەڵام موجتەبا خامنەیی وەک کاندیدی سوپای پاسداران و دامەزراوە ئەمنییەکان، دەتوانێت سەقامگیریی سیاسی و سەربازیی وڵاتەکە بپارێزێت و ڕێگری لە هەر لێکترازانێک بکات کە مەترسی بۆ سەر جوگرافیای سیاسیی شیعە لە ناوچەکەدا دروست بکات.