شێخ ئەکرەم کەعبی، ئەمینداری گشتیی بزوتنەوەی نوجەبا، پەیامێکی توندی ئاڕاستەی هێزە بیانییەکان لە عێراق کرد و ڕایگەیاند ڕێککەوتنە سیاسییەکان کە ڕێگە بە مانەوەی ئەو هێزانە دەدەن بێبایەخ و شکستخواردووە.
کەعبی لە پەیامەکەیدا گوتی هێزەکانی موقاوەمەی عێراق پێشتر لە ساڵی 2010دا بە خەباتی سەربازی توانیویانە هێزە بیانییەکان لە وڵاتەکە وەدەر بنێن، بەڵام ئێستا ئەو هێزانە لە ژێر ناوی ڕێککەوتنی سیاسیی بێ ئومێدکەر گەڕاونەتەوە.
بەپێی وتەکانی ئەو، مانەوەی ئەم هێزانە تەنیا هۆکاری ناسەقامگیریی عێراق و تێکدانی ئارامی ناوچەکەیە.
ئەمینداری گشتیی نوجەبا هەروەها ئاماژەی بەوە کرد هێزە بیانییەکان پابەند بە ڕێککەوتنەکان نەبوون و بنکە سەربازییەکانیان بۆ هێرشکردنە سەر هەندێک وڵاتی دراوسێ بەکاربردووە.
کەعبی جەختی لەوە کردەوە کە بەڵگەی تەواو لەبارەی تێوەگلانی ئەم هێزانە لە پڕۆژە تێکدەرەکان و هەوڵەکانی دروستکردنی فیتنەی ناوخۆیی لە عێراق هەیە.
لە کۆتایی پەیامەکەیدا، ئەمینداری گشتیی بزوتنەوەی نوجەبا جەختی لە پاراستنی سەروەریی عێراق کردەوە و گوتی پێویستە خاکی وڵات لە هەر هەژمونێکی بیانی پاک بکرێتەوە.
ئەم هۆشدارییە لە کاتێکدا دێت کە دەنگەکان بۆ کشانەوەی تەواوی هێزە بیانییەکان لە عێراق زیاتر دەبن و هێزەکانی موقاوەمە جەخت دەکەنەوە کە مانەوەی ئەوان هۆکاری سەرەکیی ناسەقامگیریی ناوچەکەیە.