ساجیدە عوبێد، کە بە "شاژنی چوبی" و گۆرانییە میللییەکان دەناسرایەوە، تەنها وەک هونەرمەندێک نەدەبینرا، بەڵکو ناوی بە توندی گرێدرابوو بە کۆشکەکانی سەرکردایەتی ڕژێمی بەعس. ئەو وەک دۆستێکی نزیکی خێزانی سەدام حسێن و بەتایبەتی عودەی کوڕی گەورەی سەدام دەناسرایەوە. زۆربەی ئاهەنگە تایبەتەکانی خێزانی فەرمانڕەوا و بەرپرسە باڵاکانی ئەو سەردەمە بە دەنگی ئەو گەرم دەکران.
دوای ڕووخانی ڕژێمی بەعس لە ساڵی ٢٠٠٣، ساجیدە عوبێد ڕووبەڕووی ڕەخنەی توند و پەراوێزخستن بووەوە بەهۆی پەیوەندییە نزیکەکانی لەگەڵ سەرانی ڕژێمی پێشوو. لە چەند ساڵی ڕابردوودا، هاوشێوەی زۆرێک لە هونەرمەند و کەسایەتییەکانی تری سەردەمی بەعس، شاری هەولێری وەک پەناگەیەک بۆ ژیان و نیشتەجێبوون هەڵبژارد، تا دواجار هەر لەوێش و دوای تێکچوونی باری تەندروستی کۆچی دوایی کرد.
مردنی ساجیدە عوبێد شەقامی عێراقی دابەش کردووە؛ بەشێک لە هەوادارانی وەک دەنگێکی ڕەسەنی میللی و جێگەی یادەوەرییەکانیان دەبینن، لە بەرامبەردا زۆرێکی تر بە "هونەرمەندی دەربار" و سیمبولی سەردەمێکی پڕ لە ستەم ناوی دەبەن. بڵاوبوونەوەی هەواڵی کۆچی دوایی ئەو، هاوکات لەگەڵ کۆچی دوایی کەسایەتییەکی تری بەعسی لەم هەفتەیەدا، بووەتە جێی سەرنجی چاودێران و وەک کۆتایی هاتنی نەوەیەکی تر لەو کەسانە دەبینرێت کە ڕۆژگارێک لە لوتکەی دەسەڵاتی سیاسی و هونەریی بەغدادا بوون.