پشکی هەرێمی کوردستان لە ڕەشنووسی بودجەی عێراق بۆ ساڵی ٢٠٢٧ لە ١٤.١٤٪ بۆ ١٢.٧٪ کەمکراوەتەوە. لە کۆی ٢١٧ تریلیۆن دینار، نزیکەی ١٣ تریلیۆن دینار بۆ هەرێم دیاری کراوە؛ بەڵام گەرەنتییەکی یاسایی بۆ ناردنی مووچەکان بەبێ کێشە لە ساڵی داهاتوودا نییە.ڕەشنووسی بودجەکە داوای گەڕاندنەوەی ١٢ تریلیۆن دینار بەرامبەر بە فرۆشتنی نەوتی هەرێم، هەناردەکردنی ڕۆژانە ٤٠٠ هەزار بەرمیل نەوت و ڕادەستکردنی غازی سروشتیی زیادە بە بەغدا دەکات. هەرێمیش داوای جێگیرکردنی مافەکانی لە بواری دامەزراندن، مووچە و ئیمتیازاتی فەرمانبەران کردووە.پارتی و یەکێتی بە پڕۆژەیاساکە ڕازی نین و دەڵێن دەنگی پێ نادەن. چاوەڕوان دەکرێت شاندی هەرێم جارێکی تر بۆ بەغدا بچێتەوە و بەرپرسانی عێراق نیگەرانییەکانی هەرێم لەبەرچاو بگرن.