عادل عەبدولقادر پێیوایە ئەمریکا هەرچەندە دەیەوێت لە کێشەکانی ڕۆژهەڵاتی ناوەڕاست دوور بکەوێتەوە، بەڵام بووەتە زیندانییەکی ڕازیی دەستی بەرژەوەندییە دارایی و سیاسییەکان.
لە بەشێکی گفتوگۆکەیدا ئاماژەی بەوە کرد کە ئیسرائیل بەبێ پاڵپشتی ئەمریکا ناتوانێت هاوسەنگی هێز لە بەرامبەر ئێران بپارێزێت. وتیشی:
"لۆبیی ئیسرائیلی لە واشنتۆن تەنها گوشارێکی سیاسی نییە، بەڵکو بووەتە بزوێنەرێکی سەرەکی دارایی بۆ هەڵبژاردنەکانی ئەمریکا. ئەمەش وایکردووە سیاسەتی دەرەوەی ئەمریکا هەمیشە مل بۆ بەرژەوەندییەکانی تەلئەبیب بدات، تەنانەت ئەگەر لەسەر حیسابی ناوبانگی ئەخلاقیی واشنتۆنیش بێت."
بەشێکی تری قسەکانی ئەم شرۆڤەکارە تەرخان بوو بۆ ترسی وڵاتانی کەنداو لە دووبارەبوونەوەی سیناریۆی ئەفغانستان. مامۆستا عادل پێی وایە" وڵاتانی کەنداو بۆ ڕێگریکردن لە باڵادەستیی ئێران، ملیارەها دۆلار دەڕێژنە ناو خەزێنەی ئەمریکاوە لە ڕێگەی گرێبەستی چەک و دابینکردنی بنکەی سەربازی. بەمەش ڕۆژهەڵاتی ناوەڕاست لە سەرچاوەی وزەوە گۆڕاوە بۆ گەورەترین بازاڕی پیشەسازیی سەربازیی ئەمریکا.
لە کۆتایی چاوپێکەوتنەکەدا، عادل عەبدولقادر پرسیارێکی جەوهەری وروژاند و وتی:
"ئایا بەڕاستی ئێران هەڕەشەیە، یان بوونی ئەم هەڕەشەیە بووەتە بیانوویەکی زێڕین بۆ بەردەوامیی بازرگانیی چەک؟"
ئەو پێیوایە بەبێ بوونی هەڕەشەی ئێران، نە ئیسرائیل دەتوانێت ئەمریکا وەک قەڵغان بەکاربهێنێت و نە وڵاتانی کەنداویش ئەو هەموو پارەیە خەرج دەکەن.