پەیمان عیزەدین چاودێری سیاسی لە سەرەتای وتوێژەکەدا ئاماژە بەوە دەکات" هەڵوێستە ڕاڕا و ناڕوونەکانی دۆناڵد تڕەمپ تەنیا پەیوەست نین بە کەسایەتیی سەرۆکی ئەمریکاوە، بەڵکو بابەتەکە ڕەهەندێکی زۆر لەوە قووڵتری هەیە کە پەیوەندیدارە بە جێبەجێکردنی ستراتیژێکی نوێ بۆ نەخشەی ڕۆژهەڵاتی ناوەڕاست.
پەیمام عیزەدین ڕوونی کردەوە کە ئەو گۆڕانکارییە گەورانەی ئەمڕۆ لە ناوچەکەدا دەبینرێن، چەندین ساڵ پێش ئێستا لەلایەن سیاسەتمەدارانی ئەمریکا و ئەوروپاوە پێشبینی کرابوون و لەرێگەی پڕۆژە و نەخشەڕێگەی جیاوازەوە بۆ ئامادەکردنی ڕای گشتی خستوویانەتە ڕوو.
ناوبراو ئاماژەی بە ڕووداوەکانی غەززە و لوبنان کرد و رایگەیاند: "ئەو شەڕە قورسەی بەسەر غەززەدا هات و وێرانکارییەکان، لەگەڵ ئەو لێدانانەی حزبوڵڵای لوبنان، تەنیا شەڕێک نەبوون دژی حەماس و حزبوڵڵا، بەڵکو زەمینەسازیبوون بۆ لەدایکبوونی ڕۆژهەڵاتی ناوەڕاستێکی نوێ. هەر بۆیە لە ئێستادا لەم ناوچەیە هێڵێکی نوێی ئابووریی جیهانی دادەڕێژرێتەوە و پاراستنی ئەم هێڵە شێوازی پەیوەندی و مانەوەی دەوڵەتەکان لە ناوچەکەدا دیاری دەکات."
لە بەشێکی دیکەی وتوێژەکەدا لەگەڵ پەیامنێری جام کوردی، پەیمان عیزەدین تیشکی خستە سەر پڕۆژەی ڕێڕەوی ئابووریی نوێ (لە هیندستانەوە بۆ ڕۆژهەڵاتی ناوەڕاست، پاشان لە ئیسرائیلەوە بەرهو ئەوروپا) کە لەلایەن ئەمریکا، ئیسرائیل و ئەوروپاوە بەڕێوە دەبرێت.
بە وتەی پەیام عیزەدین، ئەم ڕێڕەوە بەرژەوەندییەکانی دەوڵەتانی ناوچەکە دەکات بە دوو بەشەوە؛ بەشێکیان سوودمەند دەبن و بەشێکی دیکەشیان دەکەونە دژایەتی لەگەڵیدا. بەپێی ئەم ستراتیژە، پێویستە تەواوی ئەو وڵاتانەی دەکەونە سەر ئەم ڕێڕەوە (چی وشکانی و چی ئاوی) هێمن و ئارام بن بۆ ئەوەی هیچ مەترسییەک لەسەر کەشتیگەل و ئاڵوگۆڕی بازرگانی دروست نەبێت.
سەبارەت بە مەسەلەی ئێران و هاوپەیمانەکانی، پەیام عیزەدین ڕایگەیاند: "لێدان لە ئێران و بڕینی پەل و پۆکانی لە ناوچەکەدا، بە تەواوی خزمەت بە جێبەجێکردنی ئەم ڕێڕەوە ئابوورییە نوێیە دەکات. بەپێی ئامادەکارییەکانی ئەمریکا و وڵاتانی ئەوروپا بۆ چەسپاندنی ئەم نەخشەیە، تۆنی شەڕ و لێدان لە ئێران جارێک گەرم دەکرێتەوە و جارێک سارد دەکرێتەوە."
لە کۆتاییدا ئەو چاودێرە سیاسییە جەختی کردەوە کە هەرچەندە لە ڕووی ڕواڵەتەوە دۆخەکە پڕە لە دژایەتی و ڕاڕایی، بەڵام بەشی هەرە زۆری کێشە و ئاڵۆزییەکان پەیوەندی ڕاستەوخۆیان بە جێبەجێکردنی ئەم ستراتیژە نوێیەی نەخشەی ڕۆژهەڵاتی ناوەڕاستەوە هەیە.