کەمال محەممەد ساڵح، وەزیری سامانە سروشتییەکانی حکوومتی هەرێمی کوردستان بەوەکالەت، ڕایگەیاند لە 15ی ئابەوە دابەشکردنی بەنزینی نۆرماڵی پاڵپشتیکراو بە نرخی 750 دینار دەستی پێکردووە و ڕۆژانە 3.5 ملیۆن لیتر بەسەر پارێزگاکانی هەرێمدا دابەش دەکرێت. ئەو گوتی بەغدا لە ئێستادا تەنیا 1.75 ملیۆن لیتر بەنزین دابین دەکات، لە کاتێکدا نزیکەی 2.8 ملیۆن ئۆتۆمبێل لە هەرێم هەیە، بۆیە گفتوگۆکان لەگەڵ حکوومەتی فیدراڵ بەردەوامە بۆ زیادکردنی پشکی هەرێم. بۆ دڵنیابوون لە گەیشتنی بەنزینە پاڵپشتیکراوەکە بە هاووڵاتییان، تانکەرەکان بە GPS چاودێری دەکرێن و کامێرا لە بەنزینخانەکان دانراون، هەروەها لەگەڵ لایەنە ئەمنییەکان و قایمقامیەتەکان هەماهەنگی دەکرێت. وەزیری سامانە سروشتییەکان هەروەها ڕایگەیاند لە ڕۆژانی داهاتوودا بەنزینی موحەسەن و سوپەر بە بڕێکی زۆر دەخرێتە بازاڕەوە بۆ کەمکردنەوەی فشار لەسەر بەنزینی نۆرماڵ.