پەرلەمانی عێراق کارنامەی فەرمیی دانیشتنەکانی یەکشەممە و دووشەممەی بڵاو کردەوە، بەڵام لە هەردوو دانیشتنەکەدا هیچ بڕگەیەک بۆ تەواوکردنی کابینەی عەلی زەیدی تەرخان نەکراوە.پەرلەمان ڕۆژی یەکشەممە دانیشتنێکی تایبەت بۆ تاوتوێکردنی قەیرانی سووتەمەنیی ناوخۆ بە ئامادەبوونی باسم خزەییر، وەزیری نەوت، و ستافی وەزارەتەکە ئەنجام دەدات. ڕۆژی دووشەممەش چەند پڕۆژەیاسایەکی هەستیار، لەوانە یاسای تاوانە نێودەوڵەتییەکان، ڕێککەوتننامەی گواستنەوەی ئاسمانی لەگەڵ نەمسا و یاسای بەرەنگاربوونەوەی تاوانە ئەلیکترۆنییەکان، تاوتوێ دەکرێن.بەمەش، سەرباری چاوەڕوانییەکان بۆ یەکلاکردنەوەی پۆستە چۆڵەکانی کابینە، کارنامەی ئەم هەفتەی پەرلەمان هیچ بڕگەیەکی لەبارەی تەواوکردنی کابینەکەوە نییە.