ئەگەرچی داخرانی گەرووی هورمز زیانی بە ئابووریی جیهانی گەیاندووە و بووەتە هۆی بەرزبوونەوەی نرخەکان لە سەرانسەری جیهاندا، بەڵام چاودێران ئاماژە بەوە دەکەن کە بەرپرسیاریەتیی یەکەمی ئەم دۆخە دەکەوێتە سەر شانی ترەمپ و دەوڵەتەکەی. واشنتۆن پێی وابوو ئەرکی ئارامکردنەوە یان ملکەچکردنی ئێران پرۆسەیەکی ئاسان دەبێت، بەڵام ئێستا ڕووبەڕووی کابوسێک بووەتەوە کە تەواوی جیهانی گرتووەتەوە.
تاران جەخت دەکاتەوە کە گەرووی هورمز بەبێ جێبەجێکردنی مەرجەکانی ئێران ناکرێتەوە، و لە ئێستاشدا هیچ کەشتییەک بەبێ ڕەزامەندیی هێزەکانی ئێران هاتووچۆ ناکات. هەوڵەکانی ئەمریکاش بۆ بەرزکردنەوەی نرخی سوود بە مەبەستی ڕووبەڕووبوونەوەی قەیرانی نەوت، سەركەوتوو نەبوونه.
قالیباف لە پەیامێکدا بۆ ترەمپ ڕایگەیاند: «چەندە نرخی سوود بەرز بکەیتەوە ناتوانیت خەڵک هەڵبخەڵەتێنیت؛ چونکە قەیرانەکە لە پارەو پولدا نییە، بەڵکو قەیرانەکە لە داخرانی گەرووی هورمزدایە کە ئابووریی جیهانی تووشی تەنگژە کردووە.»
ناوبراو هەروەها بانگەشەکانی ئەمریکای بۆ کۆنتڕۆڵکردنی گەرووەکە بە «پووچ و بێ بنەما» وەسف کرد و وتی: «ئەگەر ئەمریکا دەوڵەتێکی سەرکەوتوو بووایە، بۆچی لەگەڵ ئێران لەسەر مێزی دانوستان دادەنیشت تا ڕێگەچارەیەک بۆ کۆتاییهێنان بە جەنگەکە بدۆزێتەوە؟ئەمە ڕاستییەکە کە واشنتۆن تووشی زۆنگاوێک بووە و نازانێت چۆن لێی دەربچێت.»
سەرۆکی پەرلەمانی ئێران لە کۆتایی ئاخاوتنەکانیدا ڕاستەوخۆ ئاڕاستەی ترەمپی کرد و وتی: «ئێوە جنۆکەکەتان ئامادە کرد، بەڵام ناتوانن دەری بپەڕێنن. سەرەخۆشیش لە ئەمریکای مەزن بکه کە دوای عەقڵیەتی ترەمپ کەوتووە و تەواوی هەسارەی زەوی تووشی ئاڵۆزی کردووە.»