دکتۆر یاسین تەها، مامۆستای زانکۆ و شیکەرەوەی سیاسی، لە لێدوانێکی تایبەتدا بۆ پەیامنێری جام کوردی ڕوونیکردەوە کە لایەنە سیاسییە سەرەکییەکان لە پشت پەردەوە تاووتوێی چەند بژاردەیەکی ئاڵۆز دەکەن بۆ چارەسەرکردنی کورتهێنانی دارایی.
دکتۆر یاسین تەها ئاماژەی بەوە کرد کە بەپێی دوایین زانیارییە پشتڕاستکراوەکان، حیزبە شیعەکان باسی دوو بژاردەی بنەڕەتییان کردووە بۆ چارەسەرکردنی پارەدارکردنی خەرجییەکان لە ناو بوودجەدا:
گۆڕینی سووڕی دابەشکردنی مووچە بۆ 45 ڕۆژ جارێک.
دەستکاری کردن و گۆڕینی بەهای دۆلار بەرامبەر دینار.
ناوبراو ڕوونیشیکردەوە کە بژاردەی دووەم شاراوەترە و فەرمانبەران ڕاستەوخۆ هەستی پێ ناکەن، بەڵام لە کرداردا وەک کەمکردنەوەی ناڕاستەوخۆی مووچە و دابەزاندنی توانای کڕین و بەهای دراوەکەیە.
لە وەڵامی پرسیارێکی جام کوردیدا دەربارەی هەڵوێستی هێزە سیاسییەکان، دکتۆر یاسین جەختی کردەوە کە سەرجەم حیزبەکانی بەشدار لە حکوومەتی عەلی زەیدی، بە تەواوی لەسەر ئەم بژاردانە ئاگادارن و ڕەزامەندییان لەسەر نیشان داوە.
ئەو مامۆستایەی زانکۆ ئاشکراشی کرد کە هەر لەسەر ڕەتکردنەوەی بژاردەی دەستکاری کردنی بەهای دینار بوو، «عەلی عەلاق» لە پۆستی سەرۆکایەتیی بانکی ناوەندی لادرا.
دەربارەی ئاراستەی پێچەوانەی پەرلەمانتارانیش، وتی: «ئەوەی ئێستا هەندێک لە پەرلەمانتاران دەیکەن، یان دەچێتە خانەی شەعبەوییەتەوە، یان هەوڵێکە بۆ ڕازیکردنی دەنگدەرەکانیان، یانیش زانیاری تەواوییان لەسەر ڕێککەوتنەکان نییە، بەڵام ئەم بزووتنەوەی پەرلەمانتارانەش زۆر بڕ ناکات.»
ئەم زانیارییانەی دکتۆر یاسین تەها لە کاتێکدایە کە عەلی زەیدی، لە وتارێکیدا لە ناو پەرلەمانی عێراق دەربارەی ئاڵەنگارییە داراییەکان و گۆڕینی نرخی دینار، بە ڕاشکاوی باسی لە سێ بژاردەی سەخت کردبوو لەبەردەم حکوومەتدا:
بژاردەی یەکەم: پەنابردن بۆ پاشەکەوتی زۆرەملێ و هێشتنەوەی فەرمانبەران بە بەڵێنەوە.
بژاردەی دووەم: دابەشکردنی مووچە لە هەر 45 ڕۆژ جارێکدا.
بژاردەی سێیەم: پەنابردن بۆ قەرزکردنی زیاتر و نوقمکردنی وڵات لە قەرزدا، لە کاتێکدا عێراق خۆی لە بنەڕەتدا بەدەست بارگرانی قەرزەکانەوە دەناڵێنێت.
بەپێی پێشبینییەکان، بڕیاردان لەسەر یەکێک لەم بژاردانە یەکلایی کەرەوە دەبێت بۆ داڕشتنی نەخشەی دارایی و بوودجەی ساڵانی داهاتووی وڵات.