بەپێی ئەو زانیارییانەی کە عادل حسن خستوویەتی ڕوو، لە ڕێککەوتی 29ی کانوونی دووەمی 2016، وەفدێکی ئەنجومەنی مامۆستایانی ناڕازی کۆبوونەوەیەکیان لەگەڵ نێچیرڤان بارزانی، سەرۆکی ئەوکاتی حکومەتی هەرێمی کوردستان و قوباد تاڵەبانی، جێگری سەرۆکی حکوومەت ئەنجام داوە. ناوبراو ئاماژە بەوە دەکات کە لەو کۆبوونەوەیەدا نێچیرڤان بارزانی بە ڕوونی پێی وتوون: «ئەو خۆشگوزەرانی و ژیانەی خەڵک پێش 2013 تیایدا بوون، جارێکی تر نایبیننەوە.»
پلانێکی نێودەوڵەتی و هاوشێوەی میسری کۆن
عادل حسن لە بەشێکی تری قسەکانیدا جەخت لەوە دەکاتەوە کە ئەوەی ئەمڕۆ بەسەر خەڵکی عێراق و هەرێمی کوردستاندا دەهێنرێت، پلانێکی نێودەوڵەتییە؛ هاوشێوەی ئەو پلانەی کە «جیهان سادات»، هاوسەری ئەنوەر ساداتی سەرۆکی پێشووتری میسر، پێشتر باسی کردبوو.
بەپێی گێڕانەوەکەی جیهان سادات، ئەنوەر سادات ڕۆژێک بە شێواوی و شپرزەیی گەڕابووەوە ماڵەوە و وتوویەتی: «وەفدێکی هاوبەشی ئەمریکی، بەریتانی و فەڕەنسی هاتن بۆ لام و سێ داواکارییان هەبوو:
١. هەوڵ بدەم خەڵکی میسر هەژار ببێت.
٢. هەوڵ بدەم میسرییەکان نەخوێندەوار ببنەوە.
٣. هەوڵ بدەم میسرییەکان بکەم بە مەسیحی.»
سادات ئەوکات هە سێ داواکارییەکەی ڕەتکردبووەوە و پێشبینی کردبوو کە لەبەر ئەوە لەناویان دەبەن، و بەڕاستیش تەنها دوای دوو مانگ لەو دیدارە کوژرا.
عادل حسن لەم ڕوانگەیەوە کورتەی قسەکەی دەگاتە ئەوەی کە ئەوەی ئێستا لە هەرێمی کوردستان جێبەجێ دەکرێت، هەمان پلانی ڕۆژئاوایی و ئەمریکییە. ناوبراو دەڵێت ئێستا هەوڵ دەدرێت زانست بێ نرخ بکرێت، دەنگۆی ئەوە هەیە بەشەناوخۆییەکان بکرێن بە پارە، داواکاریی مامۆستایان سەرەڕای گرتنەبەری هەموو فشارەکان پشتگوێ دەخرێن و خەڵک بە تەواوی هەژار کراوەتەوە، هاوکات ڕێکخراوەکانی بە مەسیحی کردنیش بە ئارەزووی خۆیان و بە دابینکردنی جۆرەها ئاسانکاری لە هەرێمدا کار دەکەن.
بۆیە داوا لە هاووڵاتییان دەکات تێبگەن کە هۆکاری سەرەکیی هەژارکردنەوەیان لەم ناوچەیەدا چییە.
لە بەشێکی تری نوسینەکەیدا ناوبراو تیشکی خستەسەر هەڵوێستی پەرلەمانتارانی عێراق لەبارەی دابەزاندنی نرخی سووتەمەنی و دەڵێت: «ڕۆژێک لەگەڵ پەرلەمانتارێکی عێراقدا کە باسی لەوە دەکرد لە هەرێمیش بەنزین دەکەین بە 450 دینار، پێم وت: بەڕێزت لە بەغداوە دەڵێی بەنزین لە هەرێم دەکەین بە 450 دینار، بەڵام دڵنیابە بەنزین لە بەغداش دەبێت بە 750 دینار و هەرگیز لە هەرێم بە 450 دینار نابێت.»
ڕۆڵی پارتە دەسەڵاتدارەکان و ئەمریکا
ئەندامی ئەنجومەنی مامۆستایانی ناڕازی، وڵاتانی زلهێز بەوە تۆمەتبار دەکات کە بە هاوکاریی ژمارەیەک بەرپڕسی پارتی، یەکێتی، عەلی زەیدی و کەسانی دیکە، «پلانێکی جەهەنەمییان» بۆ دانیشتوانی عێراق و هەرێم داڕشتووە. ئەو هۆشداری دەدات لەوەی کە نایەڵن خەڵک جارێکی تر بە ئاسوودەیی بژی و بە شێوەیەک ژیان وێران دەکرێت کە هاووڵاتی هەمیشە بەدوای بژێوی ڕۆژانەیدا ڕابکات.
عادل حسن پێی وایە ئەمریکا بە دانانی عەلی زەیدی ڕازی بووە بۆ ئەوەی هەموو شتێک لە عێراقدا هاوشێوەی هەرێم بکات و بە کەرتی تایبەتی ببەستێتەوە. ناوبراو پێشبینی دەکات کە لە داهاتوودا هیچ پاڵپشتییەک بۆ سووتەمەنی، کارەبا، چاودێری کۆمەڵایەتی، تەندروستی و بەشەخۆراکی مانگانە نەمێنێت، هەرچەندە لە کۆتایی لێدوانەکەیدا دەڵێت: «ئاوەتەخوازم هەڵەبم و ئەمانە ڕووینەدەن.»