نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانیی عێراق، ڕایگەیاندووە کە ئامادەکارییەکان بۆ دابەشکردنی بەشەخۆراکی حەوتەمی ئەمساڵ دەستیان پێکردووە و چاوەڕوان دەکرێت لە ماوەی ١٠ ڕۆژی داهاتوودا دابەشکردنەکە دەست پێبکات.لە هەرێمی کوردستان زیاتر لە ٤ ملیۆن و ٦٣٦ هەزار کەس سوودمەندی سیستەمی بەشەخۆراکی مانگانەن. بەشەخۆراکی هەر کەسێک بریتییە لە یەک لیتر ڕۆن، یەک قوتووی دۆشاوی تەماتە، سێ کیلۆ برنج، یەک کیلۆ شەکر، نیو کیلۆ نیسک و نیو کیلۆ لەتکەنۆک.لە لایەکی دیکەوە، بەهۆی گۆڕانی نرخی دۆلار بەرامبەر بە دینار و بەرزبوونەوەی نرخی کاڵا خۆراکییەکان، حکوومەتی عێراق چاودێریی نرخەکانی بازاڕ دەکات. هەروەها ئەگەری دابەشکردنی دوو بەشەخۆراکیی دیکەش لە ئارادایە، بەڵام ئەمە پەیوەستە بە ئەنجامی پێداچوونەوە بە نرخەکان و بەردەوامبوونی بەرزییان.