میدیای ڕۆژئاوای کوردستان دەڵێت، ئەم خۆپیشاندانە لەسەر داوا و بانگهێشتی سەرجەم چین و توێژەکان ڕێکخراوە و ئەمڕۆ کاتژمێر 10:30 خولەکی بەیانی لە بەردەم ناوچەی دوار سنووی ناوەندی قامیشلۆ بەڕێوەدەچێت.
خۆپیشاندانەکە مامۆستا و قوتابیان هەڵسوڕێنەری سەرەکین، بەڵام سەرجەم چین و توێژەکانی دیکەش تێیدا بەشدار دەبن، ئەم پێشهاتەش هاوکاتە لەگەڵ ناکۆکی نێوان ئیدارەی خۆسەری و دیمەشق لەسەر داهاتووی خوێندن بە زمانی کوردی و چۆنیەتی بەڕێوەبردنی کەرتی پەروەردە.
داواکاری فەرمی: خۆپیشاندەران لە خۆپیشاندانەکەی ئەمڕۆیاندا داوا دەکەن زمانی کوردی لە ناو دەستووری سووریادا وەک زمانێکی فەرمی لە سەرانسەری وڵاتدا دانی پێدا بنرێت و لە دامودەزگاکانی وڵات و بەتایبەتیش لە ناوچە کوردییەکاندا بەکاربهێنرێت.