بە پێی ئەخلاقە سیاسیەکان، سیاسەتی تڕەمپ کە لەسەر ئەو بنەمایەیە کە "ئەمریکا لەسەرووی هەمووان" و کەمکردنەوەی تێچووە سەربازییەکان بونیاد نراوە، ڕێک لەگەڵ گەورەترین خواستی ستراتیژیی ئێراندا یەکدەگرێتەوە، کە ئەویش "دەرپەڕاندنی هێزەکانی ئەمریکایە لە ناوچەکە". کاتێک تڕەمپ متمانەی سیاسی و سەربازی لە نێوان واشنتۆن و هەولێر لاواز دەکات، واتە بە کردەوە کورد وەک هاوپەیمانێکی سەرەکی ئەمریکا نامێنێت و بێبەری دەکات لەو چەترە پارێزەرەی کە ساڵانێکە ڕێگر بووە لە هەڵلووشینی هەرێمی کوردستان لەلایەن جەمسەری نەیارەوە.
ڕاگەیەندراوەکەی کۆمەڵەی ئاسۆی کوردستانیش کە باس لە "پیلانێکی مەترسیدار" دەکات، ئاماژەیەکی ناڕاستەوخۆیە بۆ ئەو فشارە گەورانەی کە لەلایەن گروپە چەکدارەکان کە لە بەغدا و تارانەوە لەسەر هەرێم هەیە.
چونکە تاران هەمیشە هەوڵی داوە مامەڵەی چەک و بودجە تەنها لە ڕێگەی حکومەتی ناوەندی بەغداوە بێت (کە هەژموونێکی زۆری تێدا هەیە). لێدوانەکەی تڕەمپیش شەرعییەت دەداتە ئەم داوایەی ئێران.
چونکە کاتێک کورد بە "دزینی چەک" تۆمەتبار دەکرێت، ئیدی کورد پێگەی ئەخلاقی و سیاسییان لە ناوەندە نێودەوڵەتییەکاندا لاواز دەبێت، ئەمەش ڕێگە خۆش دەکات بۆ ئێران کە فشارە ئەمنییەکانی بۆ سەر هێزە کوردییەکان زیاد بکات بەبێ ئەوەی دەنگدانەوەی نێودەوڵەتی هەبێت.
بەشێکی تری پەیامەکەی کۆمەڵەی ئاسۆی کوردستان لە ڕاستیدا هۆشدارییەکە بە ئەمریکا، کە ئەگەر ئێمە وەک کارتێکی فشار بەکاربهێنن و دواتر پشتگوێمان بخەن، ناوچەکە ڕادەستی ئەو هێزانە دەکەن کە دژی ئێوەن."
چونکە لە ڕوانگەی ئێرانەوە، هەر جۆرە دوورکەوتنەوەیەکی کورد لە ئەمریکا، دەبێتە هۆی ئەوەی کورد ناچار بێت بۆ پاراستنی مانەوەی خۆی، سازشی زیاتر بۆ تاران بکات و بچێتە ژێر سایەی "نەزمە نوێیەکەی ناوچەکە" کە ئێران ڕابەرایەتی دەکات.
ئەوەی گرنگە کورد لە بەردەم تاقیکردنەوەیەکی سەختدایە
ئەو "پیلانە"ی کە کۆمەڵەی ئاسۆی کوردستان باسی دەکات، بریتییە لەوەی کە نەیارانی کورد توانیویانە لە ڕێگەی پێدانی زانیاری و لۆبیی بەهێزەوە، تڕەمپ قایل بکەن کە کورد "وەبەرهێنەرێکی زیانبەخشە".
ئەگەر ئەم تێڕوانینە ببێتە بڕیاری فەرمی لە واشنتۆن، ئەوا هەرێمی کوردستان لەبەردەم دوو بژاردەدا دەمێنێتەوە: یا ڕادەستبوونی تەواوی هەرێمە بەو ئەجێندایانەی کە تاران لە ڕێگەی بەغداوە دەیسەپێنێت، یان ڕووبەڕووبوونەوەیەکی سەخت روو دەدات لە کاتێکدا کە هاوپەیمانە مێژووییەکەی (ئەمریکا) پشتی تێکردووە.
بۆیە، ئەم پەیامەی رێکخراوەکە هاوارێکی سیاسییە بۆ ڕێگریکردن لە کەوتنی هەرێمی کوردستان بۆ ناو بازنەی هەژموونی تەواوی کۆماری ئیسلامی ئێران، کە لە ئێستادا لێدوانەکانی تڕەمپ دەرگاکەی بۆ ئەو شکستە واڵا کردووە.