وەزارەتەکانی کشتوکاڵ و سەرچاوە ئاوییەکان پلانی وەرگرتنی گەنمی ساڵانە دادەڕێژن و دوای پەسندکردنی لەلایەن ئەنجوومەنی وەزیرانەوە جێبەجێ دەکرێت. بەپێی پلانی ئەمساڵ، بڕی 400 هەزار تۆن گەنم بۆ هەرێمی کوردستان دیاریکراوە و هەمان بڕ لە جووتیاران وەردەگیرێت.بەڕێوەبەران دەڵێن تێچووی بەرهەمهێنانی گەنم لە عێراق بەرزە، چونکە دەوڵەت پاڵپشتیی دارایی بۆ جووتیاران دابین دەکات. هەر تۆنێک گەنم بە نزیکەی 700 هەزار دینار لە جووتیار وەردەگیرێت، لە کاتێکدا نرخی بازاڕی جیهانی نزیکەی 400 هەزار دینارە.ئەم جیاوازییەی نرخە، کە دەگاتە 300 هەزار دینار لە هەر تۆنێکدا، هۆکاری سەرەکیی ئەوەیە کە گەنمی عێراق نەتوانێت لە بازاڕە جیهانییەکاندا پێشبرکێی بکات و هەناردەی بەرفراوانی بۆ دەرەوەی وڵات نەکرێت.ئەو گەنمەی لە جووتیاران وەردەگیرێت، دواتر بۆ ئاشەکان دابین دەکرێت تا ئارد بەرهەمبهێنن و لە چوارچێوەی سیستەمی بەشەخۆراکی مانگانەدا دابەش بکرێت. بەپێی ئامارەکان، عێراق ساڵانە پێویستی بە 4 ملیۆن و 200 هەزار تۆن گەنمە بۆ دابینکردنی پێداویستییە خۆراکییەکانی هاووڵاتیان.هەروەها ئاماژە بەوە کراوە کە پارەی گەنمی جووتیاران بە شێوەی خولەکی خەرج دەکرێت و پڕۆسەی وەرگرتنی بەرهەمەکان بەردەوامە. بەرپرسان جەختیان لەوەش کردووەتەوە کە عێراق ئێستا گەنجینەیەکی ستراتیژیی باشی گەنمی هەیە و توانای دابینکردنی پێداویستییە ناوخۆییەکانی پاراستووە.