شارەوانیی هەڵەبجە هەڵمەتێکی بەرین بۆ کۆکردنەوەی ئاژەڵە بەڕەڵاکان دەستپێکردووە، بە مەبەستی پاراستنی پاکوخاوێنیی ژینگە، هێشتنەوەی سیمای جوانی شار و ڕێگریکردن لە بڵاوبوونەوەی نەخۆشییەکان. بەپێی بەرپرسان، هەر لە سەرەتای هەڵمەتەکەدا ژمارەیەک ئاژەڵ دەستبەسەر کراون. شارەوانی ئاشکرای کردووە کە بۆ هەر مانگایەک سزای 150 هەزار دینار و بۆ هەر گوێرەکەیەکیش 75 هەزار دینار بەسەر خاوەنەکانیاندا دەسەپێندرێت و لە ئەگەری دووبارەبوونەوەی سەرپێچییەکەدا ڕێکاری یاسایی توندتر دەگیرێتەبەر. شارەوانی هەروەها دووپاتی کردەوە کە بەڕەڵاکردنی ئاژەڵ لە گەڕەک، شەقامە سەرەکییەکان و ناوەندی بازاڕ بە تەواوی قەدەغەیە، چونکە جگە لە شێواندنی سیمای شار، مەترسیی بۆ تەندروستیی گشتی و ژینگەش دروست دەکات.