هەواڵنێری جام کوردی لە چەند مانگی ڕابردوودا، لەگەڵ ژمارەیەک شۆفێری ئێرانی و عێراقی و بازرگان و چالاکی ئابووری و کەسانێک کە بە بەردەوامی لە سنووری پەروێزخانەوە هاتووچۆ دەکەن، وتووێژی کردووە.
بەشێکی بەرچاو لەو کەسانە ناڕەزایەتی خۆیان دەربڕیوە بەرامبەر بەو شتەی کە پێی دەڵێن "ڕەفتاری نەشیاوی هەندێک لە بریکارە سنوورییەکان" و داوایان لە بەرپرسان کردووە کە لەسەر ئەم بابەتە لێکۆڵینەوە بکەن.
شۆفێرێکی عێراقی لە وتووێژ لەگەڵ جام کوردی ڕاگەیاند: "هەڵسوکەوتی دروست لەسەر سنوور بەقەد خێرایی پێشبردنی کارەکان گرنگە، هەر ڕەفتارێکی نەشیاو کاریگەری نەرێنی لەسەر تێڕوانینی شۆفێران و چالاکوانانی ئابووری هەیە سەبارەت بە پەیوەندییەکانی نێوان هەردوو وڵات".
هەروەها بازرگانێکی هەرێمی کوردستان ڕایگەیاند: پەروێزخان گرنگترین ڕێگای بازرگانیمانە لەگەڵ ئێران، چاوەڕوانی دەکەین هەموو دەزگاکان بە پاراستنی ڕێزگرتن لە یەکتر بنەمای پەرەپێدانی پەیوەندییە ئابوورییەکان دابین بکەن.
بەگوێرەی لێدوانی ژمارەیەک لە شۆفێران و چالاکوانانی گواستنەوە کە قسەیان بۆ جام کوردی کردووە، لە هەندێک کاتدا ناڕەزایەتی بووەتە هۆی کۆبوونەوە و مانگرتنی شۆفێرانی عێراقی لەسەر سنوورەکە و بە گوتەی ئەوان، لە هەندێک حاڵەتدا پڕۆسەی چالاکییە سنوورییەکان پەکخراوە یان بۆ ماوەیەک بەتەواوی وەستاوە.
جام کوردی بە پشتبەستن بە لێدوانی چاوپێکەوتنەکان و ئەو بەڵگەنامانەی کە وەرگیراون، ئەو کەیسانە بڵاودەکاتەوە و ڕای یەکلاکەرەوە لەسەر وردەکارییەکان نادات.
لێکۆڵینەوەکانی جام کوردی دەریدەخەن کە ئەم پرسە تەنیا لەسەر لێدوانی زارەکیدا سنووردار نییە. وەشانێک لە سکاڵایەکی فەرمی کە لەبەردەستی جام کوردیدایە دەردەخات کە بازرگانێک بە ناو و چالاکانی ئابووری هەرێمی کوردستانی عێراق کە ناوەکەیمان پاراستووە، لە نامەیەکدا کە ئاراستەی پارێزگاری کرماشانی کردووە، ئیدیعای کردووە کە لە کاتی چوونە ناو سنوورەوە لەلایەن یەکێک لەو هێزانەی سەر سنوور، مامەڵەی نەشیاوی لەگەڵ کراوە و لێی دراوە و سووکایەتی پێکراوە.
هەروەها لە نامەکەدا هاتووە، چەند هاوڕێیەکی لەوانە بەرپرسانی ئێران و هەرێمی کوردستان و چالاکانی گواستنەوە، شاهیدی ڕووداوەکە بوون و وێنەی کامێراکانی چاودێریی سنووریش دەتوانێ کاریگەر بێ لە ڕوونکردنەوەی ڕەهەندەکانی ئەو پرسە. لەسەر بنەمای ئەم نامەیە، کۆپییەکیشی بۆ چەند دەزگایەکی جێبەجێکاری پارێزگاکە نێردراوە.
سنووری پەرویزخان یەکێک لە گرنگترین دەروازە ئابوورییەکانی کۆماری ئیسلامی ئێرانە لە مامەڵەکردن لەگەڵ عێراق و هەرێمی کوردستاندا و پاراستنی کەرامەتی سەردانکاران و ئاسانکاری بازرگانی و بەدواداچوونی بەپەلە بۆ سکاڵاکان دەتوانێت ڕۆڵێکی گرنگ لە پتەوکردنی پەیوەندییە ئابوورییەکان و پەرەپێدانی هەناردەکردن و باشترکردنی وێنەی کۆماری ئیسلامی ئێران لە نێو دراوسێکانیدا بگێڕێت.
جام کورد وێڕای ڕەنگدانەوەی ئەو نیگەرانییانەی کە لە لایەن شۆفێران و چالاکانی ئابوورییەوە وروژێنراون، بەتەواوەتی ئامادەیە بۆ بڵاوکردنەوەی وەڵام و ڕوونکردنەوە و بۆچوونەکانی پارێزگای کرماشان، پاسەوانی سنوور، هێزی سەر سنوور، قایمەقامی قەسر شیرین و دەزگا یان کەسانی دیکەی پەیوەندیدار، بە هەمان گرنگی و بەبێ هیچ دەستوەردانێک، بەجۆرێک کە ڕای گشتی ئاگاداری هەموو لایەنەکانی پرسەکە ببنەوە.
تایبەت بە جام کوردی