بۆ تاوتوێکردنی ڕەهەند و پەیامەکانی ئەم ڕووداوە، پەیامنێری "جام کوردی" گفتوگۆیەکی تایبەتی لەگەڵ نوسەر و شرۆڤەکاری سیاسی بیلال خەیات سازکرد، کە تێیدا تیشک خرایە سەر گرنگیی ئەم گەشتە مەراسیمییە لە ڕوانگەی جیاوازەوە.
لەسەرەتای گفتوگۆکەدا، بیلال خەیات ئاماژەی بە مێژووی پڕ لە بەربەستی سەردانەکەی خامنەئی کرد بۆ عێراق و وتی:
ئایەتوڵا"عەلی خامنەئی لە کاتی ژیانیدا هەمیشە ئارەزوویەکی زۆری هەبوو کە سەردانی عێراق بکات و بە شێوەیەکی مەیدانی سەردانی مەزارگە پیرۆزەکانی شێعە بکات، بەڵام بەربەستە سیاسییەکان و ئاڵۆزییە ئەمنییەکانی ناوچەکە لە ماوەی سێ دەیەی ڕابردوودا ڕێگر بوون لە بەدیهاتنی ئەم حەزە. بۆیە هاتنی تەرمەکەی بۆ عێراق لە ئێستادا بە جۆرێک لە جێبەجێکردنی ئەو حەزە دێرینە و هاوکات وەک پەیامێکی ستراتیژیی تاران تەماشا دەکرێت."
ئەم گەشتە کە بڕیارە دوای تەواوبوونی مەراسیمەکانی تەواف لە شارە پیرۆزەکانی نەجەف و کەربەلا بگەڕێنرێتەوە بۆ ئێران و لە مەشهەدی پیرۆز لە ناوچەی حەرەمی ئیمام ڕەزا بنێژرێت، خاوەنی هێمایەکی قووڵە.
سەبارەت بە کاریگەریی و پەیامی ئاینیی ئەم مەراسیمە، ئەو نوسەر و شرۆڤەکاری سیاسیە ڕوونیکردەوە:
بردنی تەرمی بەرزترین هێمای سیاسی و مەزهەبیی ئێران بۆ ناو جەرگەی شارە پیرۆزەکانی عێراق، هەوڵێکە بۆ نیشاندانی یەکگرتوویی و تێکەڵبوونی حەوزەی ئاینیی قوم و نەجەف.
ئەم مەراسیمە گەورەیە دەیەوێت ئەو پەیامە بگەیەنێت کە دەسەڵاتی ڕۆحی و سیاسیی شیعە سنوورە نیشتمانییەکانی بەزاندووە و ناوەندە ئاینییەکانی عێراق بەشێکی سەرەکین لەو بازنە مەزهەبییەی کە تاران سەرکردایەتی دەکات.
خوێندنی نوێژ و سازدانی ڕێوڕەسم لە نەجەف، لە لایەن لایەنگرانی ئۆپۆزسیۆن و بەرەی مقاوەمەوە وەک هێمایەکی شەرعیەتدان بە پڕۆژەی سیاسیی ئێران تەماشا دەکرێت.
لە درێژەی گفتوگۆکەدا، پەیامنێری جام کوردی پرسیاری لە کاتی گەیاندنی تەرمەکە و ڕەنگدانەوەی لەسەر گۆڕەپانی سیاسی عێراق کرد. شرۆڤەکارەکە وتی:
"کاتی گەیشتنی تەرمەکە بۆ عێراق و بەڕێوەچوونی مەراسیمەکان بە ئامادەبوونی بەرپرسانی باڵای هەردوو وڵات، نامەیەکی ڕوونی ئاڕاستەکراوە بۆ هێزە ناوخۆییەکانی عێراق و وڵاتانی ناوچەکە. تاران لە ڕێگەی ئەم دیمەنانەوە دەیەوێت بیسەلمێنێت کە ئێرانی دوای خامنەئیش بەهەمان هێز و قورسایی لە عێراقدا ئامادەیی هەیە و پاشەکشە لە پێگە و نفوزی خۆی ناکات."
ئەم بابەتە لە ناوخۆی عێراقدا بۆتە هۆی دروستبوونی دوو تێڕوانینی جیاواز:
یەکەم: بۆ هێزە سیاسی و گرووپە چەکدارە لایەنگرەکانی ئێران لە عێراق، ئەم ڕووداوە کەرەستەیەکی گەورەیە بۆ نمایشکردنی هێز و نوێکردنەوەی بەیعەت بە هاوپەیمانییە ستراتیژییەکەیان لەگەڵ کۆماری ئیسلامی.
دووەم: لە بەرامبەردا، نەیارانی ئەم پڕۆژەیە لە ناوخۆی عێراقدا ئەم کارە وەک بەزاندنی سەروەریی وڵاتەکە و نیشاندانی عێراق وەک پاشکۆیەکی جوگرافی و سیاسیی تاران لێکدەدەنەوە.
لە کۆتایی چاوپێکەوتنەکەدا لەگەڵ جام کوردی، بیلال خەیات نوسەر و شرۆڤەکاری سیاسی ئاماژەی بە پەیامە نێودەوڵەتییەکانی ئەم ڕووداوە دا و ڕایگەیاند:
"ئەم گەشتە مەراسیمییە پەیامێکی هەرێمی و نێودەوڵەتیی توندیشی تێدایە کە ڕووی دەمی لە ئەمریکا و هاوپەیمانەکانیەتی لە ناوچەکەدا. نیشاندانی توانای ڕێکخستنی مەراسیمێکی فرەوڵاتی لە نێوان ئێران و عێراقدا جەختکردنەوەیە لەسەر ئەوەی کە ستراتیژیی 'یەکگرتنی گۆڕەپانەکان' کە ئایەتوڵا خامنەئی لە ژیانیدا دایڕشتبوو هێشتا کارایە و خاک و جۆگرافیای عێراق هێڵێکی سووری پڕۆژەی بەرگریی ئێرانە."
بەم شێوەیە، گواستنەوەی تەرمەکە لە تارانەوە بۆ نەجەف و کەربەلا و پاشان بەرەو مەشهەد، تەنها ڕێوڕەسمێکی ماڵاوایی ئاسایی نییە، بەڵکو نەخشەڕێگایەکی سیاسیی نوێیە کە تاران دەیەوێت لە ڕێگەیەوە هاوسەنگیی هێز لە قۆناغی دوای خامنەئیشدا لە بەرژەوەندیی خۆی بپارێزێت.