پەیامنێری (جام کوردی) لەمبارەیەوە گفتوگۆیەکی تایبەتی لەگەڵ ڕۆژنامەنووس و فۆتۆگرافەر ناسح عەلی خەیات ئەنجامدا، کە وەک یاوەر و چاودێرێکی شاندەکە لە نزیکەوە بینەری ڕووداوەکان بووە.
پێشوازییەکی فەرمی و جەماوەری لە فڕۆکەخانەی نەجەف
ناسح عەلی خەیات لە سەرەتای قسەکانیدا بۆ (جام کوردی) ئاماژەی بە چۆنیەتی دەستپێکردنی مەراسیمەکە کرد و وتی:
"ڕوفاتی ئایەتوڵا خامنەیی لە ڕێگەی فڕۆکەخانەی نێودەوڵەتی نەجەفەوە گەیەنرایە عێراق. لەوێ پێشوازییەکی گەورە و بەرفراوانی فەرمی و ئایینی لێکرا. سەرۆک وەزیران، ئەندامانی پەرلەمان، شێخی هۆزەکان، کەسایەتییە ئایینی و سیاسییەکان، و تەنانەت هونەرمەندانیش ئامادەبوون. دوای پێشوازییەکە، تەرمەکە بۆ ماوەی دوو کاتژمێر بە ڕێگاوە بوو بەرەو مەزارگەی پیرۆزی ئیمامی عەلی (ع) لە نەجەف بە مەبەستی بەڕێکردن و خوێندنی سورەتی فاتیحە."
ئامادەبوونی شاندی هەرێمی کوردستان
فۆتۆگرافەرو رۆژنامەنوسە کوردە بەشداربووەکەی وتیشی: "ئێمە وەک شاندێک لە پارێزگاکانی سلێمانی و هەڵەبجەوە بەشداربووین، لەگەڵ ڕوفاتەکە شار بە شار گەڕاین و لە نزیکەوە شایەتی ئەو وێنا مێژووییە بووین کە لە نێوان شارەکانی بەغداد، نەجەف و کەربەلا تۆمارکرا."
ڕووداوێکی مێژوویی کەموێنە؛ ئامادەبوونی زیاتر لە 4 ملیۆن کەس
ئەو ڕۆژنامەنووس و فۆتۆگرافەرە سەرنجی خۆی لەسەر قەبارەی قەرەباخییەکە خستەڕوو و ڕایگەیاند:
زیاتر لە ٤ ملیۆن هاوڵاتی و زیارەتکار لە نەجەف و کەربەلا ئامادەبوون بۆ ماڵاوایی کۆتایی" ئەمەش ڕووداوێکە لە مێژوودا کەم وێنەیە و دووبارەبوونەوەی زۆر زەحمەتە. ئەگەر کەسێک بە چاوی خۆی نەیبینێت، بڕواکردنی لە داهاتوودا بۆ نەوەکانمان کارێکی قورس دەبێت."
چونکە ئایەتوڵا خامنەیی تەنها سەرکردەیەکی ئایینی نەبوو، بەڵکو کەسایەتییەکی جیهانی بوو کە سەرنجی هەموو جیهانی (تەنانەت ئەمریکا، ئیسرائیل و سعودیە)ی لەسەر بوو.
دڵاوایی و میواندۆستی بێپایانی خەڵکی نەجەف و کەربەلا
یەکێک لەو خاڵە سەرنجڕاکێشانەی کە ناسح عەلی خەیات جەختی لێکردەوە، سروشتی مرۆیی و میواندۆستی هاوڵاتیانی ناوچەکە بوو:
"تەواوی ماڵەکانی نەجەف و کەربەلا دەرگایان بۆ میوانەکان واڵا کردبوو. هیچ زیارەتکار و میوانێک پێویستی بەوە نەبوو پارە بۆ خواردن و خواردنەوە یان مانەوە (خەرج بکات). خەڵکی نەجەف و کەربەلا بە دڵ و بە گیان نان و ئاو و تەواوی خزمەتگوزارییەکانی ئەم مەراسیمە گەورەیان گرتە ئەستۆ."
ئارامی دەروونی لە مەزارگە پیرۆزەکان و کۆتایی گەشتەکە
لە کۆتایی چاوپێکەوتنەکەیدا لەگەڵ (جام کوردی)، ئەو رۆژنامەنوس و فۆتۆگرافەی هەڵەبجە هەستی خۆی لە کاتی سەردانیکردنی مەزارگەکان دەربڕی و وتی:
"خۆشبەختانە شادبووین بە زیارەتی مەزارگەی پیرۆزی ئیمام حسێن، ئیمام عەلی و ئیمام عەباس. ئەو شوێنە ئایینیانە ڕاستی ئارامییەکی بێپایان بە دڵ و دەروونی مرۆڤەکان دەبەخشن و زۆر گرنگە هەموو کەسێک سەردانیان بکات. بۆیە پێویستە عێراق گرنگی زیاتر بە خزمەتگوزارییەکانی ئەم شوێنە پیرۆزانە بدات."
شایەنی وتنە مەراسیمی ماڵاوایی لە تەرمی رابەری کۆچکردووی ئێران لە عێراق تا کاتژمێر ١١ی شەو لە کەربەلا بەردەوام بوو. دواتر ڕوفاتەکە بەرەو کۆماری ئیسلامی ئێران گەڕێنرایەوە و ڕۆژی هەینی لە شاری مەشهەد لە مەزارگەی تایبەتی خۆی بە خاک سپیردرا.