وەزیری سامانە سروشتییەکانی هەرێمی کوردستان ئاشکرای کرد، ئەگەر هیچ کێشەیەک ڕوونەدات، تا دوو هەفتەی داهاتوو نرخی بەنزینی نۆرماڵ بۆ 850 دینار دادەبەزێت. بەپێی لێدوانە فەرمییەکە، هەنگاوە پێویستەکان بۆ ئاسانکردنی هاوردەکردنی بەنزین بۆ ناوخۆی هەرێم دەگیرێن و پێشبینی دەکرێت لە کۆتایی ئەم هەفتەیەش نرخی بەنزینی بازرگانی بگاتە 900 دینار. لە هەمان کاتدا، وەزارەت نووسراوێکی فەرمی ئاراستەی لایەنە پەیوەندیدارەکان کردووە بۆ خێراکردنی پرۆسەی هاوردەکردنی بەنزین لە پارێزگا و ئیدارە جیاوازەکان. بەپێی ئامارەکان، هەرێمی کوردستان ڕۆژانە پێویستی بە پێنج ملیۆن لیتر بەنزین هەیە، بەڵام بەرهەمی پاڵاوگە ناوخۆییەکان تەنیا نزیکەی 40%ی ئەو پێداویستییە دابین دەکات. هەروەها کەمکردنەوەی بڕی بەنزینی دابینکراو بۆ هەرێم بووەتە هۆکاری دروستبوونی کورتی لە بازاڕدا، بۆیە هەوڵ دەدرێت ئەو کەمبوونە لە ڕێگەی هاوردەکردنی بەنزین لە ناوچەکانی دیکەی عێراقەوە چارەسەر بکرێت.