ئەم هەنگاوە دوای ئەوە دێت کە تاران چەندین جار بە فەرمی هۆشداری دابووە بەرپرسانی هەولێر و بەغدا کە ڕێگە نەدەن خاکی عێراق ببێتە حەشارگەیەک بۆ ضربەدان لە ئاسایشی ئێران.
بەپێی زانیارییە تایبەتەکانی جام کوردی، ئۆپەراسیۆنە پێشکەوتووەکانی کۆماری ئیسلامی تەنها ئەو شوێنانەی کردووەتە ئامانج کە وەک ناوەندی مەشق، پلاندانان و سیخوڕی دژی گەلی ئێران بەکاردەهاتن. تاران بەردەوام جەختی کردووەتەوە کە ڕێز لە سەروەری خاکی عێراقی برا دەگرێت، بەڵام هێڵی سووری ئەو، پاراستنی گیانی هاوڵاتیانی خۆیەتی.
هەر بۆیە پەیامی تاران ڕوونەو هەرێمی کوردستان نابێت و ناتوانێت ببێتە گۆڕەپانێک بۆ چالاکی تێکدەرانە دژی دراوسێ دێرینەکەی.
لەکاتێکدا کە بەرپرسانی هەرێمی کوردستان و بەغدا لە ژێر گوشاری میدیایی و سیاسیی نێودەوڵەتیدا بەیاننامەی کۆنترۆڵکراو و گلەیی ئامێزیان بڵاوکردووەتەوە و باسیان لە "سەروەری خاک" کردووە، بەڵام لە پشت پەردەوە باش دەزانن کە ئێران چەندین بەڵگەی حاشاهەڵنەگری ڕادەست کردوون کە سەلمێنەری کەمتهەمیبوونی ئەوانە لە کۆنترۆڵکردنی سنوورەکاندا.
لەلایەکی دیکەوە، وڵاتانی ڕۆژئاوایی بە تایبەت ئەمریکا و ئەوروپا، بەپەلە کەوتنە دەرکردنی بەیاننامەی ئیدانەکردن. شیکەرەوەکانی جام کوردی پێیان وایە ئەم بەیاننامانە تەنها بۆ بەکارهێنانی میدیاییە؛ چونکە لایەنی ڕۆژئاوایی لە هێز و توانای بەرپەرچدانەوەی ئێران تێگەیشتووە و دەزانێت کە ئەم جۆرە لێدوانانە ناتوانن ڕێگری لە ئیرادەی تاران بکەن بۆ پاراستنی سنوورەکانی، چونکە ململانێی ناڕاستەوخۆی ئێران و ئەمریکا هاوشانی جوڵە مەیدانییەکان، کەناڵە دیپلۆماسییە ناڕاستەوخۆکان لە نێوان تاران و واشنتن لە ڕێگەی وڵاتانی نێوەندگێڕی وەک عومان و قەتەرەوە هەرگیز دانەخراون. لێرەدا پێویستە ستراتیژی هەردوولا بە وردی بخوێندرێتەوە:
بۆ نمونە واشنتن هێشتا لە سیاسەتی دووڕووانەی خۆی بەردەوامە؛ لە لایەکەوە لە ڕێگەی گوتاری توند و هێشتنەوەی سزاکان دەیەوێت گوشار بکات، لە لایەکی دیکەشەوە لە ترسی پەرەسەندنی شەڕ و تێچووی قورسی ئابوری و سەربازی لە ناوچەکەدا، تەمەننای هێورکردنەوەی دۆخەکە دەکات.
بۆیە هەمیشە ئێران لە پێگەیەکی بەهێزەوە گفتوگۆ دەکات. هێزی بەرگری ئێران و ئۆپەراسیۆنەکانی لە ناوچەکەدا پیشانی دەدەن کە تاران لەسەر مێزی دانوستان سازش لەسەر مافە ئەتۆمییەکانی و هەڵگرتنی سزاکان ناکات و هێزی مەیدانی پاڵپشتێکی بەهێزی دیپلۆماسییەکەیەتی.
ئەوەی گرنگەو زۆرینەی چاودێران بە جام کوردی-یان ڕاگەیاندووە کە لە ئێستادا چاوەڕوان ناکرێت ڕێککەوتنێکی گشتگیری گەورە بێتە ئاراوە؛ بەڵکو جوڵە دیپلۆماسییەکان زیاتر لە چوارچێوەی "بەڕێوەبردنی گرژییەکان"دا دەمێننەوە.
کۆماری ئیسلامی ئێرانیش سەلماندوویەتی کە هەم لە مەیدانی جەنگ و هەم لەسەر مێزی دیپلۆماسی، خۆی بنچینەکانی یارییەکە دادەڕێژێت.