کۆمپانیای نەوتی باکوور ڕایگەیاندووە هەموو ئامادەکارییە تەکنیکی و ئەندازیارییەکان بۆ دەستپێکردنەوەی هەناردەکردنی نەوتی خاوی کێڵگەکانی کەرکووک لە ڕێگەی هێڵی ستراتیژییەوە تەواو بوون. بەپێی ڕاگەیەندراوەکە، سەرەتا بۆریی 40 ئینجی پڕ دەکرێت و دواتر تاقیکردنەوەی تەواوی سیستەمەکە ئەنجام دەدرێت. هەروەها ئاشکرا کراوە وێستگەی IT1A ئامادەیە ڕۆژانە 300 تا 350 هەزار بەرمیل نەوت وەربگرێت و بگوازێتەوە. لایەنە پەیوەندیدارەکان جەختیان کردووەتەوە کە ئەم هەنگاوە بەپێی ڕێککەوتنی نێوان حکومەتی فیدراڵ و هەرێمی کوردستان جێبەجێ دەکرێت. هەروەها ئاماژە بەوە کراوە کە هێڵە کۆنەکانی هەناردەکردنی نەوت لە ساڵی 2014ەوە وەستاون و تا ئێستا لە قۆناغی نۆژەنکردنەوەدان. بەپێی ئامارەکان، کۆمپانیای نەوتی باکوور ڕۆژانە نزیکەی 325 هەزار بەرمیل نەوت بەرهەم دەهێنێت و هێڵە نوێیەکە دەتوانێت زۆربەی ئەم بەرهەمە بگوازێتەوە.