سەردانێک کە بەپێی زانیارییە دزەپێکراوەکان بە جام کوردی گەشتووە، زیاتر تەوەرەکەی لە دەوری پاراستنی بەرژەوەندییە کۆمپانیاکانی سەر بە دەسەڵات و دۆسیە داراییە ئاڵۆزەکان دەسوڕێتەوە، نەک چارەسەری ڕیشەیی بژێویی خەڵک.
بەپێی سەرچاوە هەواڵییەکان، شاندی هەرێم لەم سەردانەدا هەڵگری چەند دۆسیەیەکی هەستیارە کە گرنگترینیان ئەمانەن:
ڕزگارکردنی کۆمپانیای کۆڕەک تیلیکۆم و هەوڵدان بۆ هەڵوەشاندنەوەی بڕیاری دەستەی ڕاگەیاندنی عێراق بۆ دەستبەسەرداگرتنی موڵکەکانی کۆمپانیاکە بەهۆی قەرزارییەوەو خستنەسەری قەرزەکانی کۆڕەک لەسەر بودجەی هەرێم.
داواکاری بۆ زیادکردنی پشکی نەوتی ڕۆژانەی ناوخۆ لە ۵۰ هەزار بەرمیلەوە بۆ ۱۴۰ هەزار بەرمیل.
دانوستان لەسەر ڕەوانەکردنی بودجەی گشتیی هەرێم بە تەواوی لەبری بەکارهێنانی تەنها سیستەمی تەرخانکردنی مووچە.
هەوڵدان بۆ ڕێگریکردن لە تۆمارکردنی هەر سکاڵایەکی نوێ لە دادگای فیدراڵی دژی هەرێم و پرسی لەکارکەوتنی پەرلەمان.
لە بەرامبەردا کاردانەوەی هاوڵاتیان بەتایبەت چینی مووچەخۆران و فەرمانبەران بە چاوێکی پڕ لە گومان و بێئومێدییەوە دەواننە ئەم هەنگاوە. چونکە پێیانوایە ئەم سەردانانە لە ڕابردوودا جگە لە بەڵێنی بێکردار و دروستکردنی قەیرانی نوێ، هیچ دەستکەوتێکی بەرجەستەی بۆ باشکردنی بژێویی ژیانیان پێنەبووە.
ئەم نائومێدی و تووڕەییەی خەڵک لە لێدوان و کاردانەوەی تۆڕە کۆمەڵایەتییەکاندا بە ڕوونی دەردەکەوێت:
لەوانە زەند مەرد لە کۆمێنتێکدا ئاماژە بە دەستێوەردانی کەسایەتییەکان دەکات و دەڵێت: "کۆڕەک هەموویان دەباتە بەغداد... پەلەمەکەن حکومەتی عێراق قۆنەرەیان پێ ماچ دەکەن."
عیرفان عەبدوڵا بە توندی ڕەخنە لە بەرژەوەندییە هاوبەشەکان دەگرێت و دەڵێت: چونکە هەموویان شەریکن لەم کۆڕەکە، هەمویان تەنگەتاوبوون، پەلەپڕووکیانە بۆ پارە."
عەلی ئەحمەد پێیوایە سەردانەکە پەیوەندی بە پرسی نەتەوەییەوە نییە و دەڵێت: "خۆ بۆ کێشەی کورد ناڕوات، بۆ تجارەتی خۆیان دەڕوات و بۆ تێکدانی زیاتری وەزعەکانە."
سەلام مەجید ئاماژە بە ئەزموونی تاڵی ڕابردوو دەکات و دەنووسێت: "هیچ سەردانێکی خێر و خۆشی بۆ میللەت بەگشتی و چینی مووچەخۆران بەتایبەتی نەبووە، جگە لە دروستکردنی قەیرانی نوێ و درێژەدان بە قەیرانەکان و چەواشەکاری لەلایەن ڕاگەیاندنە زەبەلاحەکانیانەوە."
ماوەتەوە بڵێین: متمانەی نێوان هاوڵاتیان و دەسەڵاتدارانی هەرێم لەسەر پرسی دانوستانەکان لەگەڵ بەغدا گەیشتووەتە نزمترین ئاستی خۆی. لە کاتێکدا شاندی هەرێم هەوڵی بەدەستهێنانی دەستکەوتی سیاسی و پاراستنی پشتیوانییە کۆمپانیاکانی دەدات، هاوڵاتیان و مووچەخۆران وا دەبیژن کە ئەم هەنگاوانە تەنها خزمەت بە بەرژەوەندییە تەسکە حزبی و بازرگانییەکان دەکەن و بارگرانییە داراییەکان زیاتر دەخەنە سەر شانی خەڵکی کوردستان.