سیروان بارزانی، خاوەنی کۆمپانیای کۆڕەک تیلیکۆم، دڵنیایی بە بەشداربووانی کۆڕەک دا کە سیمکارتەکانیان نەگۆڕن، چونکە بە وتەی ئەو، هێڵی کۆڕەک بە هیچ شێوەیەک ناگیرێت. هەروەها وتی هەوڵ دەدرێت خزمەتگوزاریی پەیوەندی لەگەڵ هێڵەکانی دیکە لە نزیکترین کاتدا بگەڕێندرێتەوە.بارزانی دەڵێت کۆڕەک پێش بڕیارەکانی دەستەی گەیاندنی عێراق زیاتر لە 7 ملیۆن بەکارهێنەری هەبووە و ئێستا ژمارەکەی گەیشتووەتە 3.5 ملیۆن؛ هەروەها زیاتر لە 60٪ی هاووڵاتیانی هەرێمی کوردستان هێڵی کۆڕەک بەکاردەهێنن.ئەو جەختی کردەوە کە چەندین بڕیاری دادگا لە بەرژەوەندیی کۆڕەک دەرچوون، بەڵام بە نایاسایی جێبەجێ نەکراون، و داوای لە پەرلەمانتاران کرد لە بەرامبەر ئەوەی بە «نادادی» بەرامبەر کۆمپانیاکە دەزانێت، بێدەنگ نەبن.