لە سەرەتای وتوێژەکەدا، د. کەیوان ئازاد تیشکی خستە سەر جیاوازیی بنەڕەتیی نێوان پێگەی یاسایی هەولێر و تاران و ڕایگەیاند:
«پێویستە جیاوازیی سیاسی و یاسایی بەڕوونی بزانین؛ تاران پایتەختی کۆماری ئیسلامیی ئێرانە وەک دەوڵەتێکی سەربەخۆ و بەهێزی ناوچەکە، بەڵام هەولێر پایتەختی هەرێمی کوردستانە کە هەرێمێکی نیمچەسەربەخۆیە لە چوارچێوەی دەستووری عێراقدا. نە دەبێت هەرێم بە هەمان پێوەری دەوڵەتێکی گەورەی وەک ئێران بپێورێت، نە دەشکرێت تواناکانی خۆی بە کەم سەیر بکات.»
سەبارەت بە ململانێکانی نێوان ئێران، ئەمریکا و ئیسرائیل، مامۆستاکەی زانکۆی سلێمانی ئاماژەی بەوە کرد کە زۆرێک لە پێشبینییەکان لەسەر لاوازبوونی ئێران پاشگەز بوونەوە:
لەوانە : - ئێران توانای خۆی بۆ بەردەوامی و وەڵامدانەوە نیشان دا و سەلماندی کە هەژمارکردنی هێزەکەی بە شێوەیەکی سادە، هەڵەیەکی سیاسیی گەورەیە.
- شەڕ تەنها بە تەکنەلۆژیا و هێزی سەربازی دیاری ناکرێت؛ بەڵکو جۆگرافیا، پشتگیریی ناوخۆیی، هەژماری سیاسی و توانای بەردەوامبوون ڕەگەزی یەکلاکەرەوەن.
لە کۆتاییدا نابێت بە دروشم حوکم بدەین، بەڵکو دەبێت ئەنجامی واقعی ببینین. ڕەنگە دەوڵەتێک زیانی سەربازی بەرکەوێت، بەڵام لە ڕووی سیاسییەوە خۆی ڕابگرێت.
لە وەڵامی پرسیارێکی «جام کوردی»دا دەربارەی بەردەوامیی پشتیوانییەکانی ئەمریکا بۆ کورد لە عێراق و سوریا، د. کەیوان ئازاد ڕوونیکردەوە کە سیاسەتی زلهێزەکان لەسەر هەستی هاوڕێیەتی دروست نەکراوە:
پشتیوانیی واشنتن بۆ کورد پەیوەستە بە بەرژەوەندییە ستراتیژییەکانی خۆی لە ناوچەکەدا، بەتایبەت لە ڕووبەڕووبوونەوە یان ڕاگرتنی هاوسەنگی لەگەڵ هەژموونی ئێراندا.
چونکە کاتێک گۆڕانکاری لە سیاسەتی وڵاتان ڕوودەدات، نابێت بە «فرۆشتنی کورد» ناوببرێت؛ چونکە ئەوە یاسای سیاسەتە و سەرجەم دەوڵەتەکان (ئێران، تورکیا، عێراق و ئەمریکا) بەپێی بەرژەوەندیی خۆیان هەنگاو دەنێن.
دکتۆر کەیوان ئازاد هۆشداری دا لەسەر پەرتەوازەیی ناوخۆیی کورد و ڕایگەیاند کە یەکڕیزیی کوردستان هێشتا ئامانجێکی دوورە:
وتیشی" بەبێ دامەزراوەییبوون و جێبەجێکردنی یاسا و کۆبوونەوە لەسەر خاڵە نیشتمانییەکان، دەنگی هەرێمی کوردستان لە هاوکێشەکاندا بەهێز نابێت.