جام کوردی - جەنگ دژی ئێران کە «دۆناڵد ترامپ» لە سەرەتادا بە «لاڕێیەکی بچووک» ناوی بربوو، ئێستا بۆتە هۆی سەری ئێشە و کابوسێکی گەورە بۆ سەرۆکی ئەمەریکا و حیزبەکەی (کۆماریخوازان) لە ئاستانەی هەڵبژاردنی میاندرەیی کۆنگرەدا؛ ئەوەش لە دۆخێکدا کە ترامپ پێشتر بەڵێنی دابوو ئەمەریکا لە جەنگە دەرەکییەکان بە دوور بگرێت.
ئاژانسی ئەسۆشێتدپریس لە شیکارییەکیدا بڵاوی کردەوە کە ستراتیژیستە کۆماریخوازەکان لە کۆبوونەوە داخراوەکاندا دان بەوەدا دەنێن کە ئەم جەنگە زیانێکی گەورەی بە هەوڵەکانی حیزبەکەیان گەیاندووە بۆ پاراستنی کۆنگرە لە دوو ساڵی کۆتایی سەرۆکایەتیی ترامپدا؛ بەتایبەت کە بەرزبوونەوەی نرخی بەنزین و تێچووی وزە، باری ئابووریی هاووڵاتییانی قورس کردووە.
دەنگدەران لە گرانیی نرخەکان و درێژخایەنیی جەنگ بێزار بوون
تێچووی بەرزی وزە و بێزاریی دەنگدەران لە جەنگێک کە نزیکەی هەشت مانگە بەردەوامە (لە کاتێکدا ترامپ سەرەتا پێشبینی دەکرد تەنها چەند هەفتەیەک خایەنێت)، فشارێکی زۆر خەستی خستووەتە سەر کاندیدە کۆماریخوازەکان.
ڕاپرسییە هاوبەشەکانی نێوان ئەسۆشێتدپریس و ناوەندی «نۆرک» دەریانخستووە کە دەنگدەرانی هەردوولا دەیانەوێت کۆنگرەی داهاتوو سەرنجی خۆی بخاتە سەر ئاسانکردنی ژیانی خەڵک و کۆتاییهێنان بەو جەنگە کە کاریگەریی جیهانیی لێکەوتووەتەوە.
ترامپ سوورە لەسەر ئەوەی کە تێچووی جەنگ گرنگ نییە!
نرخی بەنزین و سووتەمەنی لە ئەمەریکا هێشتا لە بەرزترین ئاستدایە، و ئەم بابەتە بۆ کۆماریخوازەکان لە ویلایەتە کۆنەپارێزەکاندا کێشە دروست کردووە. سەرەڕای ئەمەش، ترامپ لە کۆبوونەوە هەڵبژاردنییەکانیدا هەوڵ دەدات کاریگەرییە ئابوورییەکانی جەنگەکە بچووک پیشان بدات و بانگەشە بۆ مانەوەی کۆماریخوازان لە دەسەڵاتی کۆنگرەدا دەکات، هەرچەندە ئەم دۆخە بەرگریی کردن لە سیاسەتەکانی حیزبەکەی بۆ کاندیدەکان زۆر سەخت کردووە.