د. یاسین تەها ئاماژەی بەوە کرد کە کۆماری ئیسلامی ئێران خاوەن دوو ڕەهەندی جیاوازە لە مامەڵەکردن لەگەڵ قەیرانەکاندا. ناوبراو ڕایگەیاند:
"هەرچەندە دروشمەکانی ئێران هەمیشە ڕەهەندێکی شۆڕشگێڕانە و توندیان هەبووە، بەڵام مێژووی کردەیی ئەم دەوڵەتە دەریخستووە کە لە کاتی تەنگانە و قەیرانی ڕاستەقینەدا، زۆر شارەزایانە 'هونەری پاشەکشەکردن' و ئەنجامدانی هەنگاوی تاکتیکی بەکاردەهێنن."
ئەو مامۆستایەی زانکۆ دەستنیشانی کرد کە بەربەستی سەرەکی لەم قۆناغەدا کەسایەتی دۆناڵد ترەمپە. بە بڕوای ئەو، ترەمپ جیاواز لە سەرۆکەکانی پێشوو، چێژ لە تێکشکاندنی پەردەکان و ئاشکراکردنی نهێنییەکان دەبینێت و لە یارییە سیاسییەکاندا حساب بۆ شکۆی هیچ لایەنێک ناکات، چ یار بێت یان نەیار.
لە بەشێکی تری لێدوانەکەیدا بۆ "جام کوردی"، د. یاسین تەها تیشکی خستە سەر هەوڵە دیپلۆماسییەکانی پاکستان و وتی:
بەپێی زانیارییەکانی "ڕۆیتەرز" و "واشنتۆن پۆست"، بەرپرسانی پاکستان چەند ڕۆژێکە وەک نێوەندگیر لەسەر هێڵن.
هاوکات پاکستان تکای لە ترەمپ کردووە کە لەم ماوەیەدا "زمانە تیژەکەی" بەرامبەر تاران بەکارنەهێنێت.
دکتۆر یاسین دەڵێت: ئامانجی ئەم داواکارییەی ئیسلام ئاباد، ڕەخساندنی دەرفەتێکە بۆ ئەوەی دانوستانەکان ئەنجامێکی کۆنکرێتییان لێ شین ببێت.
لە کۆتایی لێدوانەکەیدا ئەو توێژەرە لە زانکۆی سلێمانی جەختی کردەوە کە قۆناغی داهاتوو تاقیکردنەوەیەکی سەخت دەبێت بۆ هەردوولا، تا بزانرێت ئایا دیپلۆماسییەتی بێدەنگ دەتوانێت گرێکوێرەی نێوان واشنتۆن و تاران بکاتەوە یان نا.