بە بڕوای بیلال خەیات، پشتبەستن بە گۆڕانکارییە مەیدانییەکان دەریدەخات کە ئەمریکا لە گەیشتن بە ئامانجە سەرەکییەکانی، کە لە ڕێگەی فشار و جەنگەوە کێشابووی، تووشی بنبەست بووە. واشنتۆن نە لە گۆڕینی سیستەمی سیاسی ئێران و نە لە بێدەنگکردنی هێزەکانی بەرەی مقاوەمە سەرکەوتوو نەبووە.
"قبووڵکردنی دانوستان و درێژکردنەوەی ئاگربەست لەلایەن ئەمریکاوە، نیشانەی گۆڕینی ستراتیژییە لە 'هێرشی ڕاستەوخۆ' بۆ 'بەڕێوەبردنی تەنگژەکان'؛ ئەمەش دانپێدانانێکی ناچارییە بەوەی ئێران تێچووی جەنگی بۆ لایەنی بەرامبەر زۆر بەرز کردووەتەوە.
لە بەشێکی تری شیکردنەوەکەیدا، خەیات ئاماژە بە ئەگەرێکی مەترسیدار دەکات. ئەو پێیوایە ئەگەر ئیدارەی ترەمپ ناچار بێت لەگەڵ ئێراندا بگاتە جۆرێک لە ڕێککەوتن یان ئاگربەست، بۆ داپۆشینی ئەم "شکستە" و ڕاستکردنەوەی وێنەی شکاوی خۆی وەک زلهێز، پەنا بۆ لێدانێکی کتوپڕ لە ناوچەیەکی تر دەبات.
بۆ نمونە ئەنجامدانی جوڵەیەکی سەربازی لە شوێنێکی وەک کوبا (بە هەمان سیناریۆی فەنزوێلا).
ئەمەش مەبەستی لێی گۆڕینی سەرنجی میدیاکانە لە شکستی بەرامبەر ئێران و بەرزکردنەوەی مەعنەویاتی ناوخۆیی ئەمریکا بە تێچوویەکی کەمتر.
سەبارەت بە ئەگەری هەڵگیرسانی جەنگێکی سەرتاسەری، شیکەرەوەکە پێیوایە ئەمە ئەگەرێکی دوورە. هۆکارەکانیشی بۆ ئەمانە دەگەڕێنێتەوە:
تێکچوونی هاوسەنگیی بازاڕی وزەی جیهانی.
بارودۆخی نالەباری ناوخۆیی ئەمریکا.
نەبوونی هاوڕایەکی نێودەوڵەتی.
بە گوتەی ئەو، هەردوولا دەزانن جەنگی ڕاستەوخۆ بە واتای "کۆتایی یارییەکە" دێت، بۆیە ئەمریکا ئاگربەست بە باشتر دەزانێت لە جەنگێکی بێ سەرەنجام.
لە لایەکی ترەوە، سوپای پاسدارانی کۆماری ئیسلامی ئێران وەک هێزی بڕیاردەری مەیدانی، هەڵوێستێکی ڕادیکاڵانەی بەرامبەر ئاگربەستە تاک لایەنەکانی ئەمریکا هەیە.
چونکە سوپا پێیوایە هەر وەستانێکی جەنگ تەنها کاتدانە بە ئەمریکا بۆ خۆڕێکخستنەوە، بۆیە هێشتنەوەی بەرەکان بە گەرمی، ڕێگری دەکات لە جێبەجێکردنی پلانە درێژخایەنەکانی ئەمریکا و ئیسرائیل بۆ گۆشەگیرکردنی ئێران.
بیلال خەیات لە کۆتایی چاوپێکەوتنەکەدا جەخت دەکاتەوە کە سوپای پاسداران جەنگ بە تاکە گەرەنتی پاراستنی دەستکەوتە ستراتیژییەکان دەبینێت و دەڵێت: "ئەگەری دەسپێشخەریی ئێران بۆ جەنگ دژی ئەمریکا و ئیسرائیل، ئەگەرێکی زۆر بەهێز و کراوەیە."