جام کوردی - سوڵتان نشینی عومان پابەندبوونی خۆی بە تێپەڕبوونی "بێبەرامبەر" بە گەرووی هورمز دووپاتکردەوە.
ئاژانسی ئانادۆڵو نووسیویەتی: بەدر ئەلبوسەیدی، وەزیری دەرەوەی عومان، درەنگانی ڕۆژی دووشەممە دوای وتووێژ لەگەڵ بەرپرسانی باڵای ئێران لە مەسقەت، پابەندبوونی وڵاتەکەی بە یاسا نێودەوڵەتییەکان و تێپەڕبوونی سەلامەتی "بێبەرامبەر" بە گەرووی هورمزدا دووپاتکردەوە.
لە بەیاننامەیەکدا کە لە پلاتفۆرمی سۆشیال میدیای ئەمریکی X بڵاوکراوەتەوە، ئەلبوسەعیدی ڕایگەیاندووە کە دانوستانەکان لەگەڵ محەمەد باقر قالیباف، سەرۆکی پەرلەمانی ئێران و عەباس عێراقچی، وەزیری دەرەوەی ئێران، تیشکیان خستۆتە سەر یاداشتنامەی لێکتێگەیشتنی ئەم دواییەی ئێران و ئەمریکا، “بەتایبەت ئەو بڕگەیەی پەیوەندیدارە بە گەرووی هورمزەوە”. ئەلبوسەعیدی وتی: پابەندبوونمان بە یاسا نێودەوڵەتییەکان و تێپەڕبوونی سەلامەتی کەشتییەلان لە هورمز بێبەرامبەر دووپاتکردەوە.
ئەم قسانە دوای ئەوە هات کە قەتەر و پاکستان، ناوبژیوانانی ئاشتی، ڕۆژی یەکشەممە دوای کۆتایی هاتنی دانوستانەکانی ئەمریکا و ئێران لە هاوینەهەواری بورگنستۆکی سویسری بەیاننامەیەکی هاوبەشیان بڵاوکردەوە و ڕایانگەیاند، لایەنەکان ڕێککەوتوون لەسەر دامەزراندنی "ناوەندی کەمکردنەوەی گرژییەکان" کە ئەمریکا، ئێران و لوبنان تێیدا بەشداربن، کە لەلایەن دوو ناوبژیوانەوە ئاسانکاری بۆ دەکرێت، بۆ دڵنیابوون لە پابەندبوون بە وەستاندنی ئۆپەراسیۆنە سەربازییەکان لە لوبنان بەپێی یادداشتنامەی ئیسلام ئاباد.