جام کوردی - وەزیرانی دەرەوەی ١٨ وڵاتی ئیسلامی هێرشی ئیسرائیلیان بۆ سەر نەخۆشخانەی نەسەر لە غەزە ئیدانە کرد و ئاگادارییان دایەوە کە بەردەوامبوونی ئەم هێرشانە دەتوانێت ئاگربەست لاواز بکات.
وەزیرانی دەرەوەی ١٨ وڵات کە زۆرینەی دانیشتووانیان موسڵمانە — لەنێویاندا سعودیە، ئیمارات، قەتەر، میسر، تورکیا و پاکستان — هێرشی ئاسمانیی ئیسرائیلیان بۆ سەر کۆمەڵگەی پزیشکیی نەسەر لە خان یونس محکوم کرد. ئەم هێرشە بووە هۆی کوژرانی لانیکەم شەش فەلەستینی، لەنێویاندا یەک نەشتەرگەر و یەک منداڵ.
ئاگادارکردنەوە لە مەترسی بۆ سەر نەخۆشەکان و کارمەندانی چارەسەر
ئەم وڵاتانە لە بەیانیەکی هاوبەشدا جەختیان کردەوە کە هێرشکردنە سەر ئەم ناوەندی چارەسەرییە پێچەوانەی یاسای نێودەوڵەتیی مرۆییە و سەلامەتی و ژیانی نەخۆشەکان و کارمەندانی بواری چارەسەر دەخاتە مەترسییەوە.
وەزیران هەروەها بەردەوامبوونی هێرشەکانی ئیسرائیلیان بۆ سەر ئاوارە فەلەستینییەکان محکوم کرد و وتیان: بەردەوامبوونی ئەم کردەوانە دەتوانێت پرۆسەی دامەزراندنی ئاگربەست لە غەزە لاواز بکات.
نیگەرانی لە کەمی یارمەتییە مرۆییەکان
لەم بەیانیەدا، سنووردارکردنەکانی ئیسرائیل بۆ هاتنەژوورەوەی یارمەتییەکانی فریاگوزاری، لەوانە ئامێری پزیشکی و پێداویستییەکانی پێویست بۆ نیشتەجێبوون لە زستاندا، ڕەخنەی لێگیرا. وەزیران ئاگادارییان دایەوە کە کەمیی شەلەر و خراپبوونی بارودۆخی ئاو، تەندروستی و خزمەتگوزارییەکانی چارەسەر، لەگەڵ نزیکبوونەوەی وەرزی سەرما، ژیانی منداڵان و منداڵانی ساوا دەخاتە مەترسییەوە.
داواکارییان لە ئیسرائیل کرد کە پابەند بێت بە ئاگربەست، ڕێگە بە هاتنەژوورەوەی یارمەتییە مرۆییەکان بە بێ بەربەست بدات، و ئەو پابەندییانەی کە لە ڕێککەوتنی ئاگربەستدا لەسەری ڕێککەوتوون جێبەجێ بکات.
وەزیرانی دەرەوەی ئەم ١٨ وڵاتە هەروەها داوایان لە واشینگتن و «ئەنجومەنی ئاشتی» کرد کە فشار بخەنە سەر ئیسرائیل بۆ کۆتاییهێنان بە سنووردارکردنەکانی هاتنەژوورەوەی یارمەتییە مرۆییەکان بۆ غەزە.