بەپێی ڕاپۆرتی جام کوردی، ئەفشین یەگانە بە ئاماژەدان بە خزمەتەکانی مانگی سوور لە ماوەی موحەڕەمدا ڕایگەیاند: "لە سەرەتای مانگی موحەڕەمەوە ئەم گرووپە لە گۆڕەپانی ئایەتوڵڵا کاشانی لە کرماشان ڕێوشوێنی گرتووەتەبەر، لەوانە دابینکردنی کەلوپەلی ئەو شوێنەی کە دوعا و نزای عاشورا تێیدا بەڕێوەدەچێت، دابەشکردنی ئاوی کانزایی و دابینکردنی خزمەتگوزاریی پزیشکی لەلایەن کەسانی خۆبەخشەوە".
ناوبراو هەروەها سەبارەت بە بەرنامەکانی ئەربەعینی حوسێنی وتی: خزمەتگوزاری فریاگوزاری مانگی سوور لە سنوورەکانی خوسرەوی و سۆمار، چ لە ناوخۆی وڵات و چ لەسەر خاکی عێراق دابین دەکرێت. بەو پێیەش بنکەی فریاگوزاری لە خاڵی سفری سنووری خوسرەوی و سۆمار دادەمەزرێن، هەروەها دوو ناوەندی پزیشکی و بنکەی فریاگوزاری لە شارەکانی مەنزەرییە و خانەقین بۆ خزمەتکردنی زیارەتکاران کار دەکەن.
بەڕێوەبەری گشتی مانگی سووری پارێزگای کرماشان جەختی لەوە کردەوە: "خزمەتگوزاری فریاگوزاری تەنیا لە سنوورەکاندا، سنووردار نییە و لە دەروازەی هاتنە ژوورەوەی پارێزگا لە کەنگاوەرەوە تا سنوورەکانی خوسرەوی و سۆمار، هەموو بنکەکانی فریاگوزاری ڕێگاوبان و لقەکانی مانگی سووری ئەو پارێزگایە ئامادەن بۆ پێشکەشکردنی خزمەتگوزاری بۆ زیارەتکارانی ئەربەعین".