بە پێی ڕاپۆرتی جام کوردی، محەممەد عارف ئیبراهیمی لە کۆبوونەوەی چالاکانی ئابووری لەگەڵ شاندی هاوبەشی ئابووری ئێران و عێراق ڕایگەیاند: تواناکان لە پێوەندییە بازرگانییەکانی ئێران و عێراق دەتوانێ ڕێگا بۆ گۆڕانکاری و پێشهاتە ئەرێنییەکان لە ئابووریی پارێزگای کرماشاندا خۆش بکات و بەربەستەکانی بەردەم چالاکییە بازرگانییەکان دەبێ بە جددی لێکۆڵینەوەی لەسەر بکرێت.
ناوبراو بە ئاماژە بە پێشینەی مێژوویی سنووری خوسرەوی وتی: بە پشتبەستن بە بەڵگەنامە بەردەستەکان، بازرگانی لەم سنوورەدا مێژوویەکی دوور و درێژی هەیە و نزیکەی 90 ساڵە پەیوەندییە بازرگانییەکان لەم ناوچەیەدا دامەزراون. ئیبراهیمی زیادی کرد: خوسرەوی دەتوانرێت پەیوەست بکرێت بە پەیوەندی نێوان "زیارەت و بازرگانی" لەگەڵ عێراقدا.
بەڕێوەبەری ماڵی کانگاکانی پارێزگا هەروەها ئاماژەی بە توانای سنووری پەروێزخان کرد و وتی: ئەم سنوورە لە قۆناغی جیاجیادا تواناکانی خۆی لە بواری بازرگانیدا نیشان داوە و بازاڕ و بارودۆخی خۆی هەیە کە دەتوانێت بە پلانی دروست ڕۆڵێکی کاریگەر بگێڕێت لە ئابوری پارێزگاکەدا.
ئیبراهیمی ئاماژە بە بازاڕی عێراقی کرد و وتی: بەغدا کە دانیشتوانەکەی نزیکەی هەشت ملیۆن کەسە و دەستڕاگەیشتن بە ڕێڕەوی پەیوەندییەکان بۆ ئوردن و سوریا، توانایەکی بەرچاوی هەیە بۆ پلاندانان لە بواری هەناردەکردنی بەرهەمی پیشەسازی و بازرگانی، هەروەها ئەگەری گواستنەوەی کەلوپەل لە ڕێگای بارهەڵگر و شەمەندەفەڕەوە، دەتوانرێت بۆ پەرەپێدانی هەناردەکردن بەکاربهێنرێت.
ناوبراو بە ئاماژەدان بە ئاماری بازرگانی وڵات لە ساڵی 1404دا وتی: هەناردەی وڵات نزیکەی 8.9 ملیار و هاوردە نزیکەی 560 ملیۆن بووە و هیوای خواست بە پلانی دروست هاوسەنگییەکی زیاتر لە نێوان هەناردەکردن و هاوردەکردندا دروست ببێت.
ئیبراهیمی هەروەها وتی: چالاکوانانی کەرتی تایبەت ئامادەن لەو دەرفەتە بۆ دەستنیشانکردنی تواناکان و بەدواداچوونی کێشە بازرگانییەکان و بەربەستەکان کەڵک وەربگرن.