بە پێی ڕاپۆرتی جام کوردی، کەیوان کاشفی لە هەشتا و دووەمین کۆبوونەوەی ئەنجومەنی وتووێژی حکومەت و کەرتی تایبەتی کرماشان، ئاساییکردنەوەی پەیوەندییەکانی ئێران و سعوودیەی بە سەرەکیترین پرسی سیاسی و ئابوری وڵات لە یەک مانگی ڕابردوو ناو برد و وتی کە کەرتی تایبەت پێشوازی لەم ڕووداوە گرنگ و ئەرێنییە دەکات.
ناوبراو بە ئاماژە بەوەی کە ئێران و سعوودیە دوو وڵاتی گەورەی ناوچەکەن، وتی کە هاوکاری سیاسی و ئابوریی هەر دوو وڵات بەستێنی سەقامگیری ناوچەکە دابین دەکات.
کاشفی ڕایگەیاند کە کەرتی تایبەت لە ئێستاوە ئامادەکارییەکانی بۆ پەیوەندی و هاوکاری ئابوری لە گەڵ سعوودیە دەستپێکردووە و بۆ ئەمەش ژووری بازرگانی ئێران پلانێکی تایبەتی ئامادە کردووە.
ئەندامی دەستەی سەرۆکایەتی ژووری ئێران وتی کە سعوودیە لەو وڵاتانەیە کە پێکەوە ژووری هاوبەشی بازرگانیمان نییە و لە داهاتوویەکی نزیکدا ئەوە ڕوو دەدات و هەنگاوێکی گرنگ دەبێت لە پێناو بەرەوپێشچوونی ئامانجە ئابورییەکانی ئێران و سعوودیە.
کەیوان کاشفی وتی: لە پاش کردنەوەی باڵیۆزخانەکان و جێگیربوونی باڵیۆزانی هەر دوو وڵات، ئاڵوگۆڕی شاندە بازرگانییەکانیش دەست پێدەکات.
ناوبراو وتی: سعوودیە ئابورییەکی گەورەیە و تا ئێستا کەڵک لەو دەرفەتە وەرنەگیراوە، بە شێوازێک کە پەیوەندییە ئابوری و بازرگانییەکانی ئێران لە گەڵ ئەم وڵاتە بۆ ساڵانێکی دوور دەگەڕێتەوە کە کۆی گشتی ئاڵوگۆڕەکان تا 200 ملیۆن دۆلار بووە.
وتیشی کە پەیوەندییەکان لە گەڵ سعوودیە دەتوانێت تا ساڵانی داهاتوو، بازرگانییەکی دوو یان سێ ملیار دۆلاری بۆ ئێران بێنێتە پێشەوە.
بە وتەی کاشفی، هەر دوو وڵات لە بوارە جیاجیاکانی وەک نەوت، پترۆکیمیا و کۆمپانیا زانست بنەماکان دەتوانن هاوکاری یەکتر بکەن./.
