تەها سلێمان نووسەر و رۆژنامەنووسی تایبەتمەند بە پرسی جینۆساید لە وتووێژی لە گەڵ دەزگای میدیایی جام کوردی، ڕایگەیاند کە کێشەی هەرە گەورەی کورد ئەوەیە کە لە بنەڕەتدا خوێندنەوەی بۆ تاوان و تاوانناسی نییە یان زانیاری پێویستی لە سەر تاوان و جۆرەکانی نییە.
ناوبراو وتی: بەم بۆنەوە تا ئێستا کورد نەیتوانیوە کار لە سەر ناسین و بنکۆڵکردنی ڕەگی تاوانەکانی بەرامبەری بکات و لە لۆکاڵییەوە بیانکاتە نێودەوڵەتی.
تەها سلێمان وتی: دیارترین نموونەش تاوانەکانی جینۆسایدکردنمانە کە جیای ناکەینەوە لە نێوان کارەسات و تاواندا، واتە پێمان وایە کە کارەسات لە تاوان گەورەترە، لە کاتێکدا کە تاوان بکەر و شوێن و جوگرافیای هەیە بەرامبەر بە زمان، نەتەوە، ئاین، ئاینزا، گرووپ و ….. بەڵام کارەسات سرووشتییە و لە دەسەڵاتی کەسدا نییە.
ئەو نووسەرە لە کۆتاییدا وتی: پێویستمان بە زانیارییە لە سەر تاوانناسی و ئەزموونی جیهانی دەرەوە بۆ ئەوەی کە چوارچێوەی کارکردنمان لە سەر ئەو تاوانانەی لە دژمان کراوە، بکرێتە چوارچێوەیەکی تەندرووست و بابەتی و کاریگەر./.
