بە پێی ڕاپۆرتی جام کوردی، سەعدی ئەحمەد پیرە وتی: ئامادەکردنی لیستی ناوی تەواوی مووچەخۆران یەکێتی ئامادەی ناکات، بەڵکوو وەزارەتی دارایی هەرێم ئامادەی دەکات و سەرپەرشتی دەکات، ئەگەر ئێمە ناومان زیادکردووە، با قسەبکەن لە کوێدا زیادمانکردووە و لە کام وەزارەت و ئاسایش و پێشمەرگە زیادمانکردووە؟ ئەو ژمارە ناوەی کە ژمارەیان 2000ە و لە وەزارەتی ناوخۆ زیاد کراوە، یەکێتی تێدا نییە.
ناوبراو وتی: لە وەزارەتی پێشمەرگەش، باس لە زیادکردنی ناوی 30 هەزار کەس دەکرێت، یان لە پەروەردە ناو زیادکراوە، ئەوانە ئێمە زیادمان نەکردوون، واتە لە سلێمانی ناوی نوێ زیاد نەکراوە بۆ لیستی مووچە.
وتەبێژی یەکێتی نیشتمانی کوردستان هەروەها ڕایگەیاند کە ئەگەر حکومەتی هەرێم یان لایەنێک دەیەوێت ناو زیاد بکات با بە ئاگاداری عێراق بێت، یەکێتی دژی زیادکردنی ناوی نوێ و بە بارمتەگرتنی مووچەی هاووڵاتیانە./.
