ئەكرەم ساڵح بەرپرسی لقی 22ی پارتی دیمۆكراتی كوردستان لە وتووێژی لە گەڵ پەیامنێری جام کوردی، ڕایگەیاند: سەردانی مەسعود پزیشكیان سەرۆک کۆماری ئێران بۆ عێراق و هەرێمی كوردستان كاریگەری گەورەی هەیە، چونكە ئێران وڵاتێكی گرنگی ناوچەكەیە و پەیوەندییەكی مێژوویی لە گەڵ گەلانی عێراق و هەرێمی كوردستاندا هەیە.
ناوبراو وتی: سەردانەكەی پزیشکیان كە یەكەمجارە دێتە هەرێمی كوردستان، بێگومان ڕەنگدانەوەی باشی دەبێت لە سەر داهاتووی پەیوەندییەكانی هەرێم و ئێران، چونكە كۆماری ئیسلامی ئێران كاریگەری گەورەی لە سەر سەقامگیری ناوچەكە هەیە، بۆیە سەردانەكە بە گشتی گرنگ و مێژووییە.
ئەكرەم ساڵح وتی: بەهیواین دەرئەنجامی ئەم سەردانە ببێتە هۆی پەیوەندییەكی باشتری هەرێم لە گەڵ كۆماری ئیسلامی و سەقامگیری زیاتر بۆ ناوچەكە و بەرەوپێشچوونی ئەو پەیوەندییانە بە جۆرێك لە بەرژەوەندی گەلانی هەردوو وڵات بێت.
بەرپرسی لقی 22 ی پارتی دیمۆکراتی کوردستان لە گەرمیان وتی: دەتوانین بە گشتی بڵێین ئەم سەردانەی پزیشكیان سەردانێكی سەركەوتوو بووە و كاریگەری باشیشی دەبێت لە سەر داهاتووی پەیوەندییەكانی نێوان هەردوولا./.
