بە پێی ڕاپۆرتی جام کوردی، ئەبوعوبەیدە وتەبێژی کەتیبەکانی عێزەدین قەسام (باڵی سەربازیی بزوتنەوەی حەماس) ڕۆژی پێنج شەممە 30 ی کانوونی دووەمی 2025، لە گرتەیەکی ڤیدیۆییدا شەهیدبوونی 7 فەرماندە و بەرپرسی باڵای بزوتنەوەکە بە تایبەت محەممەد زەیف فەرماندەی گشتی کەتیبەکانی عێزەدین قەسام ی پشتڕاست کردەوە.
ناوبراو وتی: بە بۆنەی شەهیدبوونی محەممەد زەیف (ئەبوخالید) فەرماندەی ئەرکانی هاوبەشی کەتیبەکانی عێزەدین قەسام، هاوخەمی بۆ گەلی گەورەی خۆمان دەردەبڕین.
ئەبوعوبەیدە هەروەها شەهیدبوونی مەروان عیسا جێگری شەهید محەممەد زەیف، غازی ئەبوتەماعە فەرماندەی بەشی چەک و پشتیوانی، ڕائید سابت فەرماندەی بەشی سەرچاوە مرۆییەکان، ڕافع سەلامە فەرماندەی لیوان خان یونس، ئەیمەن نۆفال فەرماندەی لیوای ناوەندیی غەززە و ئەحمەد غەندور فەرماندەی لیوای باکوری ڕاگەیاند.
وتەبێژی کەتیبەکانی عێزەدین قەسام ڕایگەیاند کە شەهیدبوونی فەرماندە گەورەکان هیچ کات ئیرادەی ئێمە لاواز ناکات و پاش شەهیدبوونی فەرماندەکان، تێکۆشەرانی ئێمە بە ورەیەکی بەرزترەوە درێژە بە خەبات دەدەن.
ئەبوعوبەیدە ڕایگەیاند کە هەزاران فەرماندە دەبنە جێگرەوەی هەر فەرماندەی شەهید و سیستەمی فەرماندەیی کەتیبەکانی عێزەدین قەسام تەنانەت بۆ یەک کاتژمێریش ڕوبەڕوی بۆشایی نەبووەتەوە.
