مونا قەهوەچی لە پەراوێزی بەڕێوەچوونی ڕێوڕەسمی ساڵیادی سەرکەوتنی شۆڕشی ئیسلامی ئێران، لە وتووێژی لە گەڵ پەیامنێری جام کوردی، وتی: ئێمە وەک پارتی چاکسازی تورکمان پیرۆزبایی لە کۆماری ئیسلامی ئێران دەکەین، ڕۆژی نیشتمانیی ئێران بە ڕۆژێکی گرنگ بۆ گەلی ئەم وڵاتە و سەرجەم وڵاتانی دراوسێ و هاوپەیمانەکانی لە ناوچەکە دادەنرێت و هیوادارین ببێتە هاندەرێک بۆ جێگیربوونی ئاشتی و ئاسایش لە ناوچەکە بە تایبەت لە عێراق.
ناوبراو وتی: هیوادارین کۆماری ئیسلامی ئێران ڕۆڵی تایبەتی خۆی لە چارەسەرکردنی کێشەکانی نێوان هەولێر و بەغدا لە چوارچێوەی دەستووری عێراقدا بگێڕێت.
ئەو ئەندامەی پەرلەمانی عێراق وتی: ئێران وڵاتێکە کە هەموو کات ڕێز لە سەروەری و دەسەڵاتی سەرجەم وڵاتان دەگرێت و هیوادارین هاندەرێک بێت بۆ ئەوەی لە عێراقدا دەستوور پێشێل نەکرێت و هەرێمی کوردستان لە چوارچێوەی ئەو دەستوورەدا مافەکانی خۆی دەستەبەر بکات.
ڕاشیگەیاند کە پارتی چاکسازی تورکمان لە سەرجەم سەردان و کۆبوونەوەکاندا جەختی لەوە کردووەتەوە کە ئێران ڕۆڵی تایبەتی لە نزیککردنەوەی تێڕوانینەکانی هەولێر و بەغدا و چارەسەرکردنی ناکۆکییەکاندا هەبێت./.
