بەپێی ڕاپۆرتی جام کوردی، لقی سلێمانی سەندیكای رۆژنامەنوسان و رێکخراوی میدیا بۆ راھێنان بەھاوکاری و سپۆنسەری دەزگای میدیایی جام كوردی لە رۆژی ٢٢ شوباتەوە بەشی یەکەمی خولێکی بۆ میدیاكارانی سلێمانی دەستپێکردبوو..
پاشنیوەڕۆی ٢٠٢٥/٢/٢٦ لە شاری سلێمانی ، بەشی یەکەمی خولی تایبەتی ” رۆژنامەنووسیی لە میدیای ئەلكترۆنیدا” كۆتایی پێهات.
خولەكە سێهەمین چالاكیی رۆژنامەوانیی بوو کە لقی سلێمانی سەندیكای رۆژنامەنوسانی کوردستان و دەزگای میدیایی جام كوردی – بەهاوكاری رێكخراوی میدیا بۆ راهێنانی رۆژنامەنووسان لەناو باڵەخانەی رێکخراوی راگەیاندن و روناکبیری ژنان ، لە شاری سلێمانی ئەنجامیاندا.
مەبەست لە خولەكە بنیاتنانی بناغەیەکی راست و دروستە بۆ کاری میدیا لە سەکۆکانی دیجیتاڵ میدیا لە چوارچێوەی یاساکانی رۆژنامەوانیدا.
لەم خولەدا لە کۆی ١٦٧ داواکاری بەشداربووان ٢٨ فێرخواز هەڵبژێردران، ئەم بەشداربووانە نزیكەی ٣٥ سەعات بەوانەی تیۆریی و پراكتیكی چەندین زانیاریی گرنگی میدیای ئەلیكترۆنییان پێدرا .
وانەبێژانی خولەکە دوو پسپۆڕی بواری میدیای نوێ بوون لە زانکۆکانی تاران بەناوەکانی ”دکتۆر حسن رەزائیی و دکتۆر حسن صدرایی عارف ”کە خاوەنی پسپۆڕین لە بواری میدیای نوێدا و لەلایەن دەزگای میدیایی جام كوردەوە بانگهێشتی شاری سلێمانی كرابوون.
وا بڕیارە دوای پێداچوونەوە بە ئاستی توانا میدیاییەكان و پلەبەندیی ئەو ٢٨ فێرخوازە، ژمارەیەكیان هەڵبژێردرێن بۆ تەواوكردنی بەشی دووەمی خولەكە لە وڵاتی ئێران .
لە قۆناغی یەكەمیشدا ئێوارەی ئەمڕۆ بە ئامادەبوونی لێپرسراوی بەشی كلتور و فەرهەنگی كونسوڵخانەی ئێران لە سلێمانی ئاغای حەسەنپور، بڕوانامەی بەشدارییكردن بە فێرخوازان بەخشرا .
شایەنی باسە لە کۆتایی ھەردوو بەشی خولەکەشدا سەرکەوتووان بڕوانامەی رەسمیی باوەڕپێکراویان پێدەبەخشرێت .
ڤینۆس تۆفیق
