بەپێی ڕاپۆرتی جام کوردی، ئێوارەی ڕۆژی ٢٠٢٥/٢/٢٨ بە ئامادەبوونی ژمارەیەكی زۆر لە هونەرمەندان و رۆشنبیران و ژمارەیەك لە میوزیكژەنانی شاری سلێمانی و هونەرمەند ئەنوەر قەرەداخی و ئەندامانی بنەماڵەی هونەرمەند محەمەدی ماملێ, لە هۆڵی هۆتێل خورشید لە شاری مەریوان، لە پانزەهەمین مەراسیمی ساڵانەیدا ، ناوەندی ماملێ، خەڵاتی ”ماملێ”ی بەخشییە میوزیكژەن و گۆرانیبێژی گەورەی كورد عەلی ئەكبەر مورادی .
مامۆستا عەلی ئەكبەر لەرێی كۆكردنەوەو بەچاپ گەیاندنی ژمارەیەكی زۆر میلۆدییەوە توانیویەتی فەرهەنگ و هونەری یارسان بە ناوچەكانی تری كوردستان و جیهان بناسێنێت و بە دروستكردنی ماڵی تەمبورەش توانیویەتی ژمارەیەكی زۆر فێرخواز و هونەرمەند پێبگەیەنێت لە شاری تاران و كرماشان.
عەلی ئەكبەر مورادی ساڵی ١٩٥٧ لە شاری كرماشان لەدایك بووەو لەبواری گۆرانی و میوزیكی كوردیدا خاوەنی چەندین كاری ناوازەیە ، دیارترین كارەكانی لەگەڵ هونەرمەندان ”شەهرامی نازی و كەیهان كەلهوڕ” بووەو بەشداریی چەندین كاری هونەریی كردووە لە لەندەن و سانفرانسیسكۆ و كالیفۆرنیا و چەندین خەڵاتی ناوخۆیی و جیهانیی وەرگرتوە.
بەپێی راپۆرتی گۆڤارێكی بەریتانی ، عەلی ئەكبەر مورادی یەكێكە لە ٥٠ میوزیكژەنە باشەكانی جیهان. مورادی لە تەمەنی شەش ساڵیدا فێری ئامێری تەمبور بووەو بۆ بەزیندوو هێشتنەوەی ئەو هونەرەش موچەی خانەنشینی و سەرجەم داهات و سەرمایەكەی خۆی تەرخانكردووە بۆ دروستكردنی ” ماڵی میوزیكی یارسان” لە ئاوایی بان زەلانی زێدی لەدایكبوونی خۆی لە شاری كرماشان.
