بە پێی ڕاپۆرتی جام کوردی، فۆئاد حوسێن وەزیری دەرەوەی عێراق لە کۆنگرەیەکی ڕۆژنامەوانی هاوبەش لە گەڵ ئەسعەد شەیبانی وەزیری دەرەوەی سوریا، وتی: عێراق و سوریا ڕوبەڕوی هەڕەشەی هاوبەش بوونەتەوە و لە کۆبوونەوەکەدا سەبارەت بە جموجوڵی گرووپی تیرۆریستی داعش لە سنورەکانی عێراق و سوریا وتووێژمان کرد.
وەزیری دەرەوەی عێراق وتی: دەستووری عێراق موڵەتی دەستێوەردان لە کاروباری ناوخۆیی وڵاتانی دیکە نادات.
فۆئاد حوسێن وتی: ڕەوشی ناوچە کەناراوییەکانی سوریا تاوتوێ کرا و نیگەرانی عێراق لە سەر ئەو ڕووداوانە بە لایەنی سوری ڕاگەێندرا.
ناوبراو جەختی لە سەر پێویستی هاوکاری نێودەوڵەتی بۆ بەرەنگاربوونەوەی تیرۆر کردەوە و وتی: ژووری عەمەلیاتی هاوبەش بۆ بەرەنگاربوونەوەی داعش هەنگاوێکی گەورە و باش دەبێت و لە داهاتوویەکی نزیکدا کار و چالاکییەکانی دەست پێدەکات.
ڕاشیگەیاند کە لە کۆبوونەوەکەدا بیرۆکەی پێکهێنانی ئەنجومەنی هاریکاری نێوان عێراق و سوریا خراوەتەڕوو.
لە درێژەی ئەو کۆنگرە ڕۆژنامەوانییەدا ئەسعەد شەیبانی وەزیری دەرەوەی قۆناغی ڕاگوزەری سوریا، ڕایگەیاند کە ئاسایشی هەر دوو وڵات کاریگەری لە سەر یەکتر دەبێت و دیمەشق هەوڵی جیدی بۆ پتەوکردنی پەیوەندییەکانی لە گەڵ عێراق دەدات.
ناوبراو وتی: سوریا ئامادەی هاوکارییە لە گەڵ عێراق بۆ بەرەنگاربوونەوەی داعش و دەبێت هەر دوو وڵات بە بێ دەستێوەردان لە کاروباری ناوخۆیی یەکتر، پێکەوە هاوکارییان هەبێت./.
